GIBALHOG sa prisuhan ang gituohang karnaper human nailad sa tag-iya sa motorsiklo kagahapon mga alas 2:00 sa kadlawon sa Crossing Macanhan ning siyudad sa Cagayan de Oro.

Ang driver nga mao si Bernardo Cabiles Jaylo Jr., 23, ulitawo, taga Zone-8, Sta Cruz Village, Carmen ning siyudad, usa ka habal-habal driver nagmaneho sa motorsiklo nagdala sa plaka KG-1797.

Gisaysay sa biktima sa kapolisan sa Police Station 4 (PS4) sa Carmen nga usa ka lalaki ang nagpatuong pasahero ug nisakay kaniya aron magpahatod sa Macanhan.

Tungod sa kaduduhang lihok ug namatikdan ang dalang kutsilyo sa pasahero nagpasumangil ang biktima nga magpatubil una sa ibabaw nga bahin.

Samtang namatikdan ni Jaylo nga adunay misunod kaniya nga kolor itom nga motorsiklo nga gituohang mga kauban sa iyang pasahero.

Dihang gisita ni Jaylo ang iyang pasahero kalit lang kining midagan hinungdan nga gitabangan og gukod sa iyang mga kaila ug nasapon. Nasayran nga suspetsado sa pagpangarnap ang maong lalaki.

Ang mga kauban niini nga sakay sa laing motorsiklo kolor itom ang daling misibat.

Gilbalhog sa prisuhan si Marjun Calimpong Malingin, 21, ulitawo, taga P-2, Balubal, ning siyudad ug nakuha sa iyang posisyon ang usa ka kutsilyo.

Samtang gidudahan sa kapolisan nga ang motorsiklo nga kolor itom nga nagsunod ni Jaylo niadtong tungora usa ka kinawat human usa ka lalaki ang nagpatabang sa Police Station 1 (PS1) sa Divisoria sa wala pa nahitabo ang maong insidente.

Ang tag-iya sa motorsiklo nga mao si Andrew Janubas ang niasoy nga wala na ang iyang XRM nga motorsiklo kolor itom nagdala og plaka KL-9356 nga giparking gawas sa usa ka tunghaan sa Velez St., ning siyudad. (SVB)