NAKUHAAN og usa ka gamay'ng plastik sa gituohang shabu ang patay'ng lawas sa usa ka lalaki niadtong Domingo mga alas 12:45 sa hapon sa Carinunga, Mabasa, Balulang ning siyudad sa Cagayan de Oro.

Gipusil sa wala mailang mga suspetsado ang biktima nga mao si Reynaldo Ababao Tuto alyas Dagol, ulitawo, nagpuyo sa susamang dapit.

Si Police Senior Inspector Nelsedaca Villanueva sa Scene of Crime Operatives (Soco) nga nahinabi sa Sun.Star SuperBalita niingon nga patay na ang biktima dihang girespondehan kinsa nakaangkon og samad sa iyang ulo.

Nakuha ang gamayng pakete sa shabu gikan sa bulsa niini sa karsones nga gisul-ob.

Walay nakuha nga basyo sa bala mao nga wala masuta unsa ang gigamit nga kalibre sa pagpamusil.

Giingong walay nakakita sa pagpusil sa biktima apan adunay nakadungog nga adunay tingog sa motorsiklo nga posibleng gisakyan sa mga suspetsado.

Ang kapolisan sa Police Station 4 (PS4) aduna nay anggulong gitutukan sa motibo sa pagpatay niini labina gyod ang kalambigitan niini sa ginadiling druga.

Pipila sab sa mga polis gikan sa PS4 nagtuo nga binuhatan na usab kini sa grupong vigilantes human niadtong nilabayng adlaw duha ka mga lalaki ang gipusil sa Lapasan ning siyudad diin usa ang nakabsan sa kinabuhi.(Stephanie V. Berganio)