PAMILYANG Bedolido mihangyo nga ipagawas gilayon ang orden de aresto batok sa mga suspek nga gitudlo nga maoy mipatay sa kanhi mamahayag nga si Nestor Bedolido aron nga madakpan sila.
Ang hangyo gipagawas human nabalaka si Marxlen, anak sa gipatay, tungod kay padayon pang gawasnon ang mga suspek kinsa giingong nagtago-tago lang sa lalawigan.
Naglaum ang pamilyang Bedolido nga walay "white wash" nga mahitabo sa kaso ilabi pa kay giingong bata-bata og gamhanang tawo sa lalawigan ang usa sa mga suspek.
Giingong usa ka piskal sa dakbayan sa Davao ang mohupot sa maong kaso kinsa maoy naggunit sa tanang kaso nga dunay kalambigitan sa pagpamatay sa mediamen.
Giangkon ni Ike Macias, tigpamaba sa pamilyang Bedolido, nga nahinabi na sa pamilya ang piskal nga mohupot sa kaso.
Giangkon ni Macias nga apil na siya karong nakadawat og hulga sa iyang kinabuhi sanglit duol siya sa pamilya ilabi na sa gipatay nga si Nestor.
Kahinumdoman nga hugot nga gilimod sa kapulisan nga dunay kalambigitan sa kaso ni Bedolido ang pagpatay kang Lito Celeste, kinsa pila na ka adlaw nga nahimong guwardiya ni Marxlen.
Gibutyag sa kapulisan nga sakop si Celeste sa mga grupong nagprotekta og illegal nga druga sa siyudad sa Digos ug nalambigit sa robbery group.
Si Senior Superintendent Ronald dela Rosa, opisyal sa kapulisan sa Davao del Sur, nagsulti nga hayan namatay si Celeste tungod sa trabaho niini sanglit nailhan sab kining gun-for-hire sa dakbayan.
Apan di motuo si Marxlen sanglit alang niya buot lamang matapin-an ang tinuod nga motibo sa krimen ug dako iyang panaghap nga mga suspek ra sab kinsa nagpatay sa iyang amahan mao ang nagpaluyo sa kamatayon ni Celeste.
Buot sab nga magpatabang ang pamilya ngadto sa Department of Justice aron hingpit nilang maangkon ang hustisya sa ilang amahan, matod ni Macias. (Superbalita)