USA ka dalaga napatay human gipusil alas 5:20 sa hapon niadtong Dominggo didto sa siyudad sa Cotabato.

Giila sa kapulisan ang biktima nga mao si Alvina Gumaca, alyas Alvin Che, 24, ug molupyo sa Midsayap, North Cotabato.

Sigun sa taho gikan sa Cotabato City Police Office nga nigawas ang biktima sa Bonny Lodging House sa dalang Bonifacio sa maong dapit sa diha nga gisugat siya sa duha ka wala mailhing mga suspetsado ug gipusil gamit ang kalibre .45 nga pistola.

Patay gilayon ang dalaga nga naigo sa iyang tuong dughan ug ulo samtang ang mga mamumuno dali nga misibat sakay sa XRM nga motorsiklo paingon sa wala matino nga direksyon.

Matud sa roomboy, kinsa wala magpaila aron dili initan, nga una gipatay ang biktima nag-check-in siya uban ang usa ka lalaki kinsa unang migawas sa lodging house.

Ang kapulisan padayong nagsusi sa hitabo aron sa pag-ila sa mga suspetsado ug masuta ang tinuod nga hinungdan sa kamatayon sa biktima. (Edgardo Fuerzas)