SUKO. Naitok si Cong. Tomas Osmeña sa estorya nga way kwarta nga magamit si Mayor Mike Rama alang sa iyang P200 milyunes nga proyekto tungod kay migawas nga iyang gihurot og gasto ang pundo sa dakbayan sa mayor pa siya.
Kuwang na lang moingon si Kongresista Tomas nga mga “estupido” ang na-habilin sa city hall. Angayan sad ikasuko ni Kongresista Tomas ang maong isyu. Abi kay di na man siya mayor siya ang gidakdakan sa pagbasol.
Apan morag tinuod nga way pundo ang dakbayan kay kon atong mahinumduman di ba nanghambog man si Kongresista Tomas nga P600 milyunes ang ilang “political budget” aron lang mapildi si Atan Guardo ug mga kandidato sa Partido Kusug.
Miingon si Kongresista Tomas nga dunay P153 milyunes nga pundo alang sa mga proyekto sa barangay sa Local Development Fund (LDF) nga wa niya gihilabti aron magamit ni Mayor Rama.
Matod pas balita nga sa Enero 2011 pa makaimplementar si Mayor Mike sa iyang mga proyekto tungod kay sa sunod tuig pa nga dunay surplus nga P1 bilyun ang dakbayan. Og tinuod ni, pagkalouy sa bag-ong mayor sa dakbayan.
Kon atong tuhoan si Kongresista Tomas nga dunay pundo nga mahimo nga ma-realign alang sa proyekto ni Mayor Mike sa iyang unang 100 ka adlaw sa opisina, morag nagkinahanglan pang tudloan pa si Mayor Mike parte aning trabahoa.
Wa tingali nakat-onan si Mayor Mike sa pila kabuwan nga siya acting mayor sa dakbayan samtang nagbakasyon si kaniadto Mayor Tomas sa Estados Unidos aron pagpa check up sa iyang operasyon sa cancer.
Kon si Kongresista Tomas nakahibawo aning pundo nga pwedeng magamit ni Mayor Mike sa iyang P200 milyun nga proyekto, nganong wa man makahibawo si Mayor Mike? Kinsa man ang nagtago aning P153 milyon nga LDF?
Wa kaha gisabotahi si Mayor Mike sa mga tawo sa city hall tungod kay mogastog P5 milyunes aron pag-ayo sa iyang opisina?
Sa unang 100 ka adlaw ni Mayor Mike sa opisina nagkabangi na dayon sila ni Kongresista Tomas tungod sa pundo sa dakbayan.
Maayo tingali ang pangutok ni Kongresista Tomas niadtong higayona kay wa man siya mangasaba ni Mayor Mike nga mibutyag sa prensa nga way pundo ang dakbayan alang sa iyang P200 milyun nga proyekto.
****
BAGSAKAN. Ang plano ni kaniadto Mandaue Mayor Teddy Ouano nga bagsakan o tiangge sa mga lagutmon, utanon, prutas ug uban pa nga direkta gikan sa mga mag-uuma diha dapit sa agriculture wa madayon.
Apan ang grupo sa Philippine Business for Social Progress (PBSP) nga gipangulohan sa usa ka batan-on nga negosyante, Jon Ramos, miabli sa bagsakan diha sa Bridges Town Square sa Barangay Alang-Alang, Mandaue.
Ang gitawag nga “Kumprahan sa Supermerkado,” nga gituhoan nga nag-una dinhi sa Visayas ug Mindanao giablihan niadtong Mayo.
Ang mga mag-uuma mobaligya na og deretso sa katawhan.
Dugay na ang mga reklamo sa mga mag-uuma nga gamay ra silag kitaon nga ginansiya tungod kay gikontrolar sa mga kumprador ang ilang presyo. Sa bagsakan, wa nay lugar ang mga middleman o kumprador.
Matod pa ni Ramos nga panahon nga mag-usab kitang katawhan sa kinaiyahan pinaagi sa pagpalit sa ang mga utanon ug prutas nga organic o wa maggamit og chemical fertilizer.
Pagkadalaygon sa gibuhat sa PBSP ug ni Ramos. Mokita na og dako ang mga mag-uuma sa ilang gipananom, presko na ug makabarato pa gyud ang mapalit sa katawhan.
(elespinoza53@yahoo.com)