Ramon Gallardo
Cebu City
Kaigang sa palibot
Mga namok mokuliot
Sa dunggan makasapot
Ni Undo wa katulog
Hangtod ulo nagduog-duog
Nga naghinuktok
Sa madulom nga suok.
Nangindahay sa kahiladman
Kon ikabalik pa lang
Ang tiktak sa orasan
Kainit sa ulo unta mapugngan
Di mabanlod sa bilanggoan
Kinabuhi ang hinungdan
Nakutlo kay nahinaykan.
Balay nga bato karon gipuy-an
Pagbasol gibati hilabihan
Apan ulahi na ang tanan
Kay anaa ka na man
Sa malang-og nga prisuhan.
Pangandoy migitib sa dughan
Kon duna lang untay kagawasan
Didto hinuktokan nang daan
Paglikay sa kalisdanan
Nga mosangpot sa kaalautan.
Laraw nga dautan
Timbangon una’s kaisipan
Samtang anaa pay kahigayunan
Nga dili mahigtan
Sa gapos sa katarungan.