DUHA ka mga lalaki ang nagpakamatay tungod lamang sa panaglalis bahin sa kuwarta dinhi sa siyudad sa Davao.
Unang biktima nga nagbitay na sulod sa lawak alas 10:30 sa gabii niadtong Sabado mao si Joseph Canete Ragasa, 23, laborer, molupyo sa Kilometro 11, Barangay Sasa, siyudad sa Davao.
Sa imbestigasyon ni PO1 Cloudette P. Luis sa Sasa Police Station, naglalis ang biktima ug kapuyo nga si Emily Avila Carbonell, 25. Nasayran nga naglalis ang duha gumikan sa kuwarta sa biktima nga nawala sa pitaka.
Alas 9:00 sa gabii samang adlaw, misulod ang biktima sa ilang kuwarto dayon nanirado.
Suma sa report, wa na mitingog ang biktima dihang gisampit sa iyang kapuyo nga gipugos pag-abli ang pultahan sa ilang lawak.
Nakurat ang kapuyo tungod kay nakita niya nga nagbitay na ang iyang partner nga wala nay kinabuhi.
Gisulayan pagdala sa balay tambalanan ang biktima apan patay na siya.
Samtang sa Calinan District, patay na sab nga nagbitay sa sanga sa durian si Lyndon Egsolin Cabantao, 25, minyo, residente sa Purok 10, Barangay Sirib, Calinan District, ning siyudad.
Sa spot report ni SPO1 Rimel Serado, nakita na lamang sa asawa niini nga nagbitay na sa punoan sa duryan ang iyang asawa.
Wala silay laing gilalisan gawas lamang sa pagpahulam og kuwarta sa biktima ngadto sa higala niini.
Sa pagkakaron, ang kapulisan sa Sasa ug sa Calinan mihimo nag dugang pagpanubay aron sayron kung dunay foul play sa duha ka mga insidente.