BABAYENG hamtong nga mamaligyaay og prutas gitulis ug gipatay samtang natulog daplin sa aseras.
Kwarta nga kapin sa P3,000, usa ka karton sa prutas ang nawala, samtang kutsilyo napalgang nalubong sa lawas sa biktima.
Nagduda ang kapulisan nga rugby boys ang ningtulis ug ningpatay sa biktima.
Nadiskubrehan ang biktima nga si Urbana Monares, 55, taga Brgy. San Vicente, Tabogon, Sugbo pasado alas 5 kagahapon sa kaadlawon sa sidewalk sa Osmena Boulevard, duol sa Provincial Capitol.
Sa pasiuna nga imbestigasyon nga gihimo nila ni PO3 Geofrey Gutual, PO3 Victor Ayuman, PO2 Cristobal Geronimo ug PO2 Lou Pagara sa Homicide Section nagbutyag nga usa ka ginganlan og Rotche Guisando, mamaligyaay og newspaper ang unang nakadiskubre sa biktima.
Mao na lay namat-an ni Guisando nga nawalis na ang gitabon nga dakong payng sa biktima.Diha iyang nakita si Monares nga nagtakilid nga nabulit sa dugo ang kalawasan.
Ang security guard sa usa ka bakery duol sa nahitabo-an ang unang nanawag sa Fuente Police samtang ang Fuente police nay nipahibawo sa mga sakop sa Homicide Section ug Scene of the Crime Operations (SOCO).
Atol sa imbestigasyon sa kapolisan, nasayran nga nawala na ang knapsack sa biktima nga iyang giunlanan ug didto gisulod ang kwarta nga kapin sa P3,000 isip halin sa adlaw nga Dominggo.
Nawala na usab ang usa ka karton nga gisudlan sa nagkalainlaing prutas nga baligya sa biktima.
Nitumaw ang pagduda sa kapulisan nga mga rugby boys ang ningtulis ug ningpatay sa biktima kay anaa kini magsuroysuroy sa dapit.
Ang anak sa biktima nga si Jenny Inot, kinsa anaa usab namaligya og prutas pipila ka metros ang gilay-on gikan sa iyang inahan, niingon nga wa gyud sila makabantay nga may kasikas.
Gipukaw na lang siya sa iyang mga kauban nga natulog usab sa aseras.
Paghiling sa mga sakop sa Soco, may samad ang biktima sa iyang tiyan, dughan, liog ug bukton.
Ang handle sa kutsilyo ginama sa kahoy diha kilid sa lawas sa biktima ug gituohan nga ang blade sa kutsilyo nahabilin sa lawas ni Monares.
Ang kapulisan sa Theft and Robbery Section (trs) ug mga sakop sa Homicide ang nagtambayayong sa paghimo sa imbestigasyon.
Sa pagka karon, wa pay nakuhang saksi ang kapolisan kon si kinsa ang nitulis ug nipatay sa biktima.Nagtuo usab ang kapulisan nga nasuhito sa biktima ang tulisan kay nasayod nga diha sa knapsack ibutang sa biktima ang iyang halin ug unlanan panahon sa iyang pagkatulog.(JFT)