PULOS nilanding sa balay tambalanan ang mag-uyab human nabanggaan kagahapon mga alas 2:00 sa kadlawon sa Velez St., ning siyudad sa Cagayan de Oro.
Giila ang biktima nga mao sila si Grashel Nabat, 21, taga Kauswagan ning siyudad, ug uyab nga si Ramil Perez, 23, ulitawo, taga Iponan ning siyudad.
Sa gihimong pakighinabi sa Sun.Star SuperBalita ngadto kang Perez, kinsa out patient sa Northern Mindanao Medical Center (NMMC), gisaysay niini nga gikan lamang sila niadtong tungora sa usa ka balay kalingawan kay nagselebrar sa iyang adlawng natawhan apan dihang pagtabok sa dalan kalit lang nga nabanggaan sa usa ka muticab apan wala makuha ang plaka.
Ang mga biktima pulos biktima sa hit and run.
Giklaro usab niini nga walay kamatuoran ang nigawas nga taho nabanggaan ang mga biktima tungod kay naghalok tunga sa dalan ug nagakos gawas pa sa pulos apektado ug ilimnong makahubog.
"Dili mana tinoud, kusog gyod kayo dagan sa multicab mao nabanggaan mi," ni Perez.
Nakaangkon og pangos sa nawong samtang samad sa likod nga bahin kang Nabat kinsa padayon pang giatiman sa mga doktor ning panahona.
Gani nagpasalamat ang biktima nga pulos anaa sila sa luwas nga kahimtang ning panahona bisan paman wala pa masayod ang ilang tagsa-tagsa ka pamilya sa nahitabo kanila. (SVB)