PADAYON pa nga gihulat sa mga sakop sa Commission on Elections (Comelec) ning siyudad sa Cagayan de Oro ang mando sa kaulohan kung kanus-an ang Sangguniang Kabataan registration ug barangay registration.
Si Ona dela Rosa personahe sa City Comelec niingon sa Sun.Star SuperBalita nga dili pa gyod kumpirmado kung kanus- ang rehistro labina nga wala silay nadawat nga memorandum gikan sa kaulohan.
Apan nagtuo kining karong umaabot nga Agusto posibleng matigayon ang registration tungod kay una na kini nga na-postponed ga unta sa sunod naman nga semana ning bulan sa Hulyo apan daghan ang niingon sayo pa kayo alang niini.
Ang pag-rehistro himuon 125 ka adlaw sa dili pa ang eleksiyon.
Ang mga batan-on nga nag-edad og 15 ngadto 17 lamang ang mahimong magrehistro sa SK samtang 18 pataas ang sa barangay.
Bisan wala pay nadawat nga mando nagtuo si Dela Rosa nga atol sa registration, dili gyod mahimong isagol ang barangay ngadto sa SK ug adunay adlaw nga igahin alang kanila labina kasagaran kanila mga tinun-an sa high school ug college.
Kahinumduman nga gitakda ang barangay ug SK election karong umaabot October 29, ning tuig apan dili gihapon kumpirmado kung mahidayon labina sa namatikdang mga pagkalangan sa registration.