DUHA ka mga lalaki ang nagtingkagol sa prisuhan human nakuhaan og karnap nga motorsiklo niadtong Huwebes sa hapon sa Barangay Cugman, siyudad sa Cagayan de Oro.
Giila ang mga suspek nga mao silang Noel Montebon ug Allan Palad, hingkod ang edad, residente sa Barangay Molugan, lungsod sa El Salvador, Misamis Oriental.
Sa inisyal nga report sa Police Station 10 (PS10) sa Cugman, nasuta nga ang mga suspetsado mihimakak og dako nga aduna silay kalambigitan sa pagpangarnap tungod kay ang motorsiklo daw igo lang nila napalit og P7 mil ngadto kang Reynan Camingaw, 22, taga Bugo ning siyudad kinsa detinado usab sa Tagoloan Police Station human nadakpan sa kapolisan sa maong dapit.
Nasuta nga ang motorsiklo nga giingong unang gi-chop chop ang gipanag iyahan ni Rogelio Obial, hingkod ang edad, taga Barangay Cugman ning siyudad.
Taliwala nga gi-chop chop na ang iyang motorsiklo ug nausab na ang hitsura niini naila gyod niya gihapon kini.
Si Palad ug Montebon hugot nga nihimakak sa kalambigitan nila sa carnapping tungod kay daw gibaligya lamang kini kanila gani daw ang motorsiklo ni Montebo gikarnap usab kaniadto ug wala na makita.
Sa pagkakaron, ang kaso padayon pa nga giimbestigahan sa kapolisan kung unsa ka tinuod ang gibutyag sa mga suspetsado nga wala silay kalambigitan sa carnapping.