KARON nga kusog na ang lahugay sa City Hall, nikusog sab ang mga hangyo sa katawhan alang sa serbisyo gikan sa gobyerno. Mao kini ang saad ni Mayor Inday Sara sa iyang unang speech niadtong Hunyo 28 human siya nanumpa sa katungdanan.
Busa di malikayan nga may mga sulat-hangyo kaniya nga puwedeng himuan og lakang isip inahan sa atong lungsod.
Usa niini mao ang sulat sa grupo nga gitawag og Concerned Nutrition Scholars and Friends diin gihatagan ako og kopya. Mao kini ang ilang sulat: "Congratulations kanimo Madam ug sa imong amahan sa pagdaug sa niaging piniliay. Nagsulat kami aron ipasang-at ang dugay na untang namong na-obserbahan sa pagpadagan sa City Health Office. Dili kami pormal nga organisasyon ug dili kini pagsaway kondili suggestion lang nga unta hatagan nimo og aksiyon isip Mayor sa siyudad aron makaserbisyo pa kini og samot sa tanang katawhan. Ilabi na karong ang Nutrition Month, na-encourage na sab kami nga sulatan ka kay ikaw ra gyud ang makatabang niini.
Ang Nutrition Office usa ka importanteng opisina sa City Government sa pag atiman sa kahimsog sa mga babaye ug bata apan kulang kaayo kini og personahe tungod kay didto man hinuon na-assign ang pipila ka mga plantilla Registered Nutritionists sa DMC imbis nga didto sa mga distrito sa Davao.
Sa among nadungog, mga 5 ka nutritionists ang tua didto samtang ang anaa sa distrito nagdoble-doble og trabaho ug ang uban gidala lang og dili Registered Nutritionist sama sa Buhangin.
Ambot kon unsay gibuhat nila didto kay ang uban maghulat lang sa oras sa pag-uli nga nahimo na hinuong source sa intriga sa ubang kawani, ilabina sa pag-assign nila sa Mental Hospital kay mora na man sila'g 15-30.
May mga kawani sa DMC nga gustong isumbong kini sa media o kang Mayor Rody apan ilang nahibaloan nga may kaso pa daw kini sa Nutrition Office.
Duna pa mi nadunggan nga nagkasakit og dengue ang nutritionist sa Paquibato District sa kanunay niyang pag-uban sa Medical Mission sa Salapawan, Mapula ug sa layo nga lugar sa Paquibato.
Natakdan pa kuno niya ang iyang gamay nga anak pagbalik-balik sa Paquibato kay lagi trabaho man. Imbis maatiman niya ang trabaho sa nutrition didto na hinuon siya na-busy sa medical team kay siya ra man usa ang galihok sa maong distrito.
Busa nag-ampo kami Madam nga unta ibalik na sa ilang tinuod nga puwesto nga mga gi-assign nga nutritionists sa DMC kay kulang gyud og tawo sa Nutrition Office.
Wa kami gisaway o gidaut nga mga tawo niini apan unta lantawon sa gobyerno ang panginahanglan sa katawhan imbis sa personal nga away o bangi sa mga anaa sa awtoridad.
Di sab kini butang-butang lang sa mga kaaway ninyo sa politika kay imo man ming mga supporters ug puwede man nimong masayran ang kamatuoran sa mga records sa imong office ug sa CHO ug sa DMC mismo.
Malipay kaming mga ordinaryong lumilihok sa nutrition sa barangay bisan gamay ang honorarium nga may kawani sa Nutrition Office nga motabang kanamo kanunay."
Unta masulbad nimo ni Inday.