ANG dapit diin napuhag ang giingon nga "shabu tiangge" giila nga usa sa mga lugar nga hot spots sa barangay opisyal sa Barangay 76-A Bucana, siyudad sa Davao.

Kini ang pahayag ni Kapitan Robert Olanolan human nasikop ang 29 ka mga tawo nga gidudahang drug pusher sa mga sakop sa Criminal Investigation and Detection Group (CIDG) niadtong Sabado.

Sa unang report sa CIDG, mga suspetsado nagpuyo sa Purok 8, Barangay 31-D Poblacion ilawom ni Kapitan Evelyn Verde apan ning uwahing katikaran nahisakop diay ang pinuy-anan sa mga dinakpan sa Barangay 76-A Bucana.

Si Olanolan nagklaro nga wala marehistro sa iyang barangay ang nahisgutang mga suspetsado tungod kay pulos lamang sila mga "renters" kun nangabang.

Siya nagsulti nga nadismaya siya human nasayud sa balita nga dunay tiguwang babaye ang namaligya og shabu.

Si Olanolan nagkanayon nga sulod-guwa lamang ang maong tawo sa nahisgutang lugar sanglit daghan og agianan ang iyang barangay nga kasikbit lang sab sa Barangay 31-D Poblacion.

Ang opisyal nagtinguha nga makapasaka og ordinansa nga magmando sa mga tag-iya og boarding house nga mosumite og report sa barangay bahin sa 'profile' sa mga renters.

Ang kapitan nagbutyag nga kinahanglan nga motabang sab ang katawhan sa barangay aron masumpo ang pagpamaligya og illegal drugs.

Sa maong ronda, nasikop sila si Robelyn Remulta, alyas Bebeng, 28; Marcelita Adin, 33; Naima Butocan, alyas Butching, 24; Pidong Bandera, alyas Pidong, 57, minyo, sari-sari store owner; Amelita Bayabao, 25, asawa ni Samad; Salazar Bayabao, alyas Kusa, 23, minyo, pulos nagpuyo sa Purok 8, Barangay 31-D Poblacion, ning siyudad.

Mga molupyo sa maong lugar nagkabuang og panagan lakip na si Samad Bayabao (bana ni Amelita) nga maoy usa sa mga tawo nga subject sa search warrant nga gipaguwa ni Executive Judge Isaac Robillo Jr.

Samtang gihimo ang ronda, gisikop sab ang silingan sa magtiayong Bayabao nga si Sarah Tausing, 34, minyo, tungod kay naghupot siya og 16 ka pakete nga shabu.

Ang kasong paglapas sa Republic Act 9165 kun Comprehensive Dangerous Drugs Act 2002 gipasaka na sa CIDG didto sa City Prosecutor's Office. (AD)