USA ang patay ug laing lima ang naangol sa pagbusikad sa bomba alas 8:30 sa gabii niadtong Lunes didto sa probinsiya sa Maguindanao.

Nailhan sa kapulisan ang biktima nga namatay nga si Moctar Mandal, 9, samtang ang mga samaran mao sila Yusof Agumbasi, principal sa Datu Gumbay Elementary School; Nasser Simpao, DepEd supervisor sa Datu Saudi Ampatuan, Maguindanao; mga bata nga sila Manuel Agumbasi, 11; Manzal Pigasan; ug Majib Mandal, ug mga molupyo sa Barangay Poblacion, Datu Piang.

Gibutyag ni Musib Tan, executive assistant, ni Datu Piang Municipal Mayor Datu Sammer Uy Tan, nga mibusikad ang improvised explosive device (IED) sulod sa guard house sa entrance gate sa Municipal Plaza, duol lamang sa police station.

Gidugang ni Tan nga sa wa pa nahitabo ang pagbusikad sa bomba, nakit-an sa mga sibilyan ang duha ka wala mailhing tawo nga dunay gibilin nga plastic bag sa guardhouse unya dali nga mibiya sakay sa XRM nga motorsiklo paingon sa wala matino nga direksyon.

Daghan ang nagtuo nga posibling dunay kalambigitan ang grupo ni Kumander Tatah Puti, miyembro sa Moro Islamic Liberation Front (MILF) Lost Command, sa hitabo tungod kay dunay kasuko kang Mayor Sammer Uy Tan gumikan sa personal nga away sa politika.

Gitahasan na ni Governor Esmael Mangundadatu ang kapulisan alang sa paghimo og imbestigasyon sa hitabo ug pag-ila sa mga tawo nga nalambigit. (Edgardo Fuerzas)