USA ka sundalo ang namatay ug laing lima ang naangol human sila gibanhigan sa mga sakop sa Moro Islamic Liberation Front (MILF) didto sa probinsiya sa Lanao del Sur.

Apan ang militar nagdumili sa pagbutyag sa pangan sa napatay ug mga samarong nga mga sundalo gumikan kay wala pa mapahibawo ang ilang tagsa-tagsa ka mga pamilya.

Sa nahagpat nga taho gikan sa Lanao del Sur Police Provincial Office, nasayran nga banda alas 5:00 sa buntag, Hulyo 13, nagpatrolya ang mga sakop sa 103rd Brigade sa Philippine Army sa Barangay Poona, Bayabao.

Mga sundalo nakadawat sayo niini og impormasyon nga didto gidala sa mga kidnaper si Noraldin, anak ni Commission on Election Commissioner Elias Yusoph. Apan gibanhigan ang mga sundalo sa grupo ni Kumander Delta sa MILF.

Hinuon, bisan kon naunhan ang puwersa sa kagamhanan, mibalos sila sa pagpabuto sa ilang mga armas batok sa mga rebelde.

Ang kombati tali sa duha ka grupo milungtad pa og 30 minutos una misibat ang mga kaaway.

Miatras ang mga rebelde sa diha nga nahiabot ang dugang mga kasundalohan ug miabag sa ilang mga kauban.

Tungod niini, gatusan ka mga sibilyan namakwet gikan sa maong dapit sa kahadlok nga maipit sa kagubot. (Edgardo Fuerzas)