DUHA ka mga tawo ang namatay ug laing tulo ang angol human nagbangga ang usa ka Delica van ug trak de karga didto sa National Highway, Barangay Tapia, lungsod sa Montevista, Comval Province, Lunes sa buntag.
Nailhan ang mga biktimang namatay nga mao sila si Benjomar Taute ug si Macmac Ubac, ug pulos molupyo sa dakbayan sa Davao.
Samtang ang mga angol sa pikas bahin, mao sila si Edgar Solis, ug si Hilario Cabrera ug ang wa pa mailhing biktima.
Sa report nga gipagawas sa Comval Province Police Provincial Office kagahapon nasayran nga nahitabo ang aksidente pasado alas 6:15 sa buntag, samtang sakay sa usa ka Delica van nga dunay plate number RBV-630 sila Ubac, Taute ug Solis nga gidrayban mismo sa biktimang si Taute gikan sa dakbayan sa Davao padulong sa lungsod sa Trento, Agusan del Sur.
Pag-abot sa nahisgutang dapit, mibangga sila sa gikasugat nga trak de karga nga dunay plate number ZDL-714 ug gidrayban ni Cabrera.
Tungod sa kakusog sa impak, nangagupi ug nalumping ang duha ka mga sakyanan resulta sa pagkahiagum og mga pangos ug bun-og sa kalawasan sa mga sakay.
Sila Taute ug Ubac nakutloan sa ilang kinabuhi diha-diha dayon tungod sa grabing kadaut nga nahiaguman sa ilang lawas.
Sila si Solis ug Cabrera ug ang laing usa ka sakay sa trak de karga nadala pa sa ospital.
Migawas sa inisyal nga imbestigasyon sa mga sakop sa Montevista Municipal Police Station nga mi-overtake sa gisundang motorsiklo ang trak de karga, ug pag-abot sa kurbada nga bahin, wa nabantayan sa drayber ang gikasugat nga Delica van ug nagbangga sila.
Kapulisan mihimo na og dugang imbestigasyon sa nahisgutang hitabo. (Marvin Pineda)