MAAYO si Cebu City Mayor Mike Rama kay nagsulti sa tinuod nga wa siyay kuwartang magamit alang sa pagpatuman ug mga proyekto kay way pundo ang kagamhanan sa siyudad.

Sa ato pa, sukwahi kini sa gipanghambog ni Kongressman Tomas Osmena sa dihang mayor pa siya nga dunay dul-an sa usa ka bilyones ka pesos nga budget ang City Hall.

Updates on President Benigno Aquino III's presidency

Asa man kini karon ang kuwarta? Asa man mokuha og kuwarta si Mike alang sa iyang mga proyekto? Daghan ra ba ang nagtuo nga gihurot ni Tomas pagasto niadtong election aron sa pagsiguro sa iyang kadaogan ug ni Mike.

Tungod niini magpaabot ta nga ingnon ni Tomas si Mike nga dipa gyud kamaong mangitag kuwarta. Tinuod na kay si Mike di man kamaong mangawat ug di mosud ug kuwestyunableng transaksyon aron lang makakuwarta ang siyudad.

Nasayud ta nga tarong si Mike ug wa kini malambigit sa mga binoang nga transaksyon. Suma gud sa kadugay niya sa City Hall mas nanghilam-os pa sa kontrobersya si Tomas.

TRAYDOR SI PB SITOY?

Kon si Provincial Board Member Arleigh Sitoy maoy pasultion nag-inusara siyang oposisyon sa tanang mga sakop sa hunta provincial kay Liberal Party man siya.

Apan yuna pa,wa kaha masayop si Sitoy? Ug si Board Member Agnes Magpale tingale ang insakto pinaagi sa pag-ingon nga si Sitoy sakop sa One Cebu Party.

Ang record maoy nagsulti sa matuod. Kon mao ni maldito gyud ni si Sitoy kay gustong mamangka sa dalawang ilog.

Kini nakapahinumdum nako sa sulti sa iyang amahan nga si Mayor Adelino Sitoy sa wa pa ang election sa Mayo 2010 nga ang hulga ni Arleigh nga modagan sa pagka mayor batok sa iyang amahan kay wa hatagi og allowance.

Gawas niini gitrayduran ni Arleigh ang iyang ka partymate nga si Edmund Sanchez kay misikit kini ni Teddy Ouano aron malakip sa pagdaog sa pagka pb.

Karon asa man gyud ka, Board Member Sitoy, Gwen o Greg? Mao kini ang pangutana sa mga kauban nimo sa hunta provincial.

Pagpili aron maklaro. Total naa na bitaw kay suweldo ug di allawans ug wana kinahanglana aron manghulga.

KINI UNTA PRES.NOY

Ang wangwang di maoy nag-unang problema sa nasud. Kun di ang problema sa kamahal sa pagkaon, medisina, pinuy-anan,

way trabaho ug uban pa.

Kini unta maoy unang gihatagaan og pagtagad ni presidente Noynoy Aquino kaysa anang wangwang nga diman gyud na problema.

Kun di pagpakita lang na nga siya usa ka ordinaryong presidente.

Kun kini maoy hatagan og unang pagtagad magpiyesta sa kalipay ang katawhan. Ang tan-aw man gud sa mga yanong lungsoranan pareho ra ang tanang presidente di makahatag ug solusyon sa ilang problema.. Hinaot lahi si P. NOY.

Kini lang problema sa kamahal sa presyo sa gasolina wa may nahimo ang nangaging mga presidente. Angayan lang unta nga tagaan og pagtagad aron gukdon ang mga higanting kompaniya sa lana.

Dinhi lang sa Sugbo mas mahal ang presyo sa gasolina ug krudo ikompara sa prisyo sa Manila ug Mindanao. Kon kini matagad ni Noynoy maoy pagmatuod nga presidente siya sa mga kabus.

Sa uwahi lang ganI nga survey sa Social Weather Station (SWS ) 88 porsiyento ang pagsalig sa katawhan ngadto kaniya.

(efren_lonzon@yahoo.com 09084171222)