DAHUNOG sa lahi nga kisaw. Kini mahitabo karong Sabado, Hulyo 17, sa University of San Carlos (USC), Main Campus sa alas 9 sa buntag sa Buttenbruch Hall paglusad sa tulo ka mga bag-ong basahon.
Kalihukan kini sa Cebuano Studies Center ug sa USC Press kinsa maoy nagmantala ning tulo ka mga libro: Crack Shot (Hingigo) and other Stories, Where a Fire Tree Grows and other Stories, ug Conversational Cebuano.
Mga orihinal sa lumad natong pinulongan ang mga basahon nga gihubad sa Ingles ni Prof. Hope S. Yu sa USC Dept. of Languages. Bug-at ang mga libro kay nagdugag balhibo sa ulo sa Sugbuanong katitikan (literature).
Dawaton nato nga hinay ang lakang sa atong literatura. Apan sa iyang pagtunob sa yuta molakra ang tinuod nga alampat (art). Kon husayon sad sunod kita sa Tagalog sa gilapdon, abot, ug gibug-aton.
Tuod, di kaayo daghan ang mga abot sa Sugbuanong Literatura kon mga basahon sa sugilanon ug balak ang hisgutan. Di kay kuwang ta sa mga bangiitang magsusulat ug magbabalak. Ang hinungdan mao ang hagip-ot nga kahigayunan tungod sa salapi.
Ning higayuna magpasalamat kita sa USC Press sa paglibro sa akong mga sugilanon bisan adunay atbang nga hubad. Bunga kini sa paninguha, kait-on ug panlantaw ni Prof Yu nga maoy Literary Coordinator sa National Commission for Culture and the Arts (NCCA).
Niadtong miaging tuig gilusad sa NCCA ang basahon ni Gremer Chan Reyes "Men at Sea (Mga Binuhat sa Lawod) and other Stories." Mga sugilanon nga gipanday sa katimgas sa atong pinulongan ug sa iyang panlantaw nga di matugkad sa usa lamang ka dupa nga pangisip.
Diha poy libro sa balak sa taga Bathalad Inc., "Pasumbingay" nga gimantala sa NCCA ug kadtong mga personal nilang gipatik ni Butch Bandillo, "Kadtong Nalubong nga Tsinelas" ug Adonis Durado, "Minugbo". Si Bandillo usa ka Consul ug si Adorado usa ka graphic artist nga atua karon sa Oman.
May mga magsusuwat kansang agi angayan sad sa paglibro sama nila ni Ric Patalinjug, June Canizares ug Lamberto Ceballos.
Mga batan-on sama nila ni Richel Dorotan, Michael Obenieta (duna na), Januar Yap (duna na), Joshua Cabrera ug
Bambie Beltran.
Kahinumdoman nga sa dekada '60, ang mga obra sa usa ka leyenda nga si Marcel Navarra gimantala sa University of the Philippines (UP). Si Navarra mao ang giila nga amahan sa modernong panugilanon sa Sugbuanong Literatura.
Ang giilang amahan sa Sugbuanong Literatura mao si Vicente Sotto. Ang mga prinsipe sa pamalak mao sila si Vicente Ranudo ug Vicente Padriga. Namukway ang ilang ngalan sa mga dekada '20, '30, '40 ug '50.
May nanagna nga di makalahutay ang Sugbuanong Literatura sa umaabot. Haguka nga panagna kay samtang buhi pa ang atong pinulongan naa nagbutokbutok ang atong katitikan. Ang Bathalad karon gisapwang sa mga lig-ong bukton sa mga batan-ong magsusuwat. Kamatuoran sa usa ka buluwanong umaabot.
Samtang maghuwat ta niini, dapiton ko una kamo sa pagtambog ning maong paglusad sa mga basahon nila Dr. Erlinda Alburo, ning maglilindog ug Lina Espina Moore. gapasan.erns@yahoo.com