NANGAANGOL ang 18 ka mga sakop sa Regional Public Safety Battalion (RPSB) nga kanhi (Regional Mobile Group (RMG-7) nga nagpahigayon sa Special Counter Insurgency Training human mangaigo sa kilat kagahapon sa udto sa Sitio Camansiles, Brgy. Lamakan, lungsod sa Sibonga.

Si Sr. Supt. Rey Lyndon Lawas, hepe sa RPSB, niingon nga 321 ka mga personnel ang nipaubos sa field training exercise nga kabahin sa ilang 45 ka adlaw nga traning ug matapos unta sa ikatulong semana ning buwana.

Updates on President Benigno Aquino III's presidency

Matod pa ni Lawas nga ang tulo ka mga personnel nga dunay seryusong paso tungod sa kilat naglangkob nila ni PO1 Aldrin Lorente, PO1 Edmund Sumalinog, ug Edward Gonzales.

Ang mao nga mga pulis nakaangkon o 2nd degree burns sa ilang mga lawas.

Ang tulo giobserbahan sa mga doctor sa South General Hospital diha sa dakbayan sa Naga, uban sa laing siyam niini ka mga kauban samtang ang unom pa ka mga personnel luwas na apan gidala sa Medical Service sa Camp Sotero Cabahug sa dan Gorordo ning dakbayan sa Sugbo.

Gipadayag niini nga naniudto na unta ang gipaubos sa training sa usa ka section sa trainee dihang kalit lang niliti ug nikilat.

Nangaigo ang iyang mga sakop, tulo niini maaoy nagrabihan.

Si Lorente maoy unang naigo human ang iyang shotgun nga gidala gidakop sa kilat.

Nidakop usab kini sa iyang mga kauban ug gani niaso pa ang sinina niini sa ka kusog sa kuryente.

Gipadayag ni Lawas nga gi-monitor sa mga doctor ang 12 ka mga biktima human usab nakaangkon og mga 2nd degree burn ug nakasinati og mga pagpuypoy sa ilang mga lawas ug katiilan.

"Open space man gud na nga ang area. Didto gyud sa bungtod dihang nag-circle sila nga nag-boodle fight dihang kalit lang niliti. Pwerting kusoga sa kilat. Usa sa mga naigo niaso ang sinina. Wala hinuon masunog," sumala pa ni Lawas.

Gibutyag niini nga nangayo silag panabang sa kapulisan sa Sibonga aron magpadalag ambulansiya nga kasakyan sanglit mokabat pa sa kapin sa duha ka kilometro ang gilay-on sa lugar didto sa ilang kampo.

Hinuon giklaro niini nga si Chief Supt. Lani-O Nerez director sa Police Regional Office (PRO-7) mipasalig nga bayran sa PRO-7 ang tanang gastuhan sa hospital sa mga nangaangol.