ANG delegasyon sa Dabaw nga gilangkuban og 42 miyembro atleta ug coaches molupad sakay sa Cebu Pacific alas 6 sa buntag karong adlawa, Hulyo 17, padulong Malolos, Bulacan alang sa 2015 Batang Pinoy Luzon Leg karong Hulyo 18 hangtod 23.
Atol sa Davao Sportswriter Association (DSA) Forum didto sa The Annex Event Center-SM Davao kagahapong adlawa, gibutyag ni Sports Development Division of the City Mayor's Office (SDD-CMO) staff Pochollo Elegino nga gisulti sa mga coaches nga paningkamotan nila modaug sa maong torneyo.
"Ingon nila sa ako kay nag-meeting man, paningkamotan nila. Basta ingon sab ko nila, do your best no pressure and enjoy the game & focus. Hopefully, they will bring the bacon," ni Elegino.
Dugang ni Elegino nga duna tsansa ang tanan pambato tungod sa ekspresensiya sa mga bata labina sa billiard, "Migradwar na ang gold medalist, mga silver medalist na lang nabilin hopefully maka-gold sila kay padayon man ang ilang training."
Samtang ang mga lugar dulaon sa matag event: judo himuon sa Robinson's Place Malolos samtang ang baseball ug archery events dulaon sa Bulacan Sports Complex.
Ang billiards ipahigayon sa Rizal Memorial Sports Complex Billiard Hall.
Ang lokal nga gobyerno ang migasto sa delegation's travelling expenses, meal allowances ug local transportation nga mobalor sa kinatibuk-an P1 milyon.