TUNGOD sa nasinating pag-ulan ug kusog nga hangin niadtong Martes, tulo ka mga motorsiklo ang nabangga diin mga biktima pulos nilanding sa Northern Mindanao Medical Center ning siyudad sa Cagayan de Oro.

Unang insidente natigayon niadtong Martes mga alas 9:00 sa gabii sa lungsod sa Alubijid, Misamis Oriental diin biktima mao si Henry Gacia, 31, minyo, sa susamang dapit.

Sakay ang biktima sa iyang motorsiklo nga pauli na sa puloy-anan dihang tungod sa kadanlog sa semento gumikan sa kusog nga pag-ulan nadigyas kini hinungdan sa pagkaligid ug pagkabunal sa ulo niini sa semento.

Nakaangkon og pangos sa nawong ang biktima, ug nabali ang tuong bahin sa tiil niini nga daling gidala sa NMMC human nakita sa mga residente sa dapit nga

nagbuy-od.

Samtang laing biktima sa susamang dapit nga mao si Lloyd Jhon Javier, 18, taga Barangay Lanao, susamang lungsod ang samaran ug kritikal ang kondisyon human nabangga ang gimanehong motorsiklo samtang gisubay ang dalan nga kusog nga ulan.

Giingong dili maklaro niini ang dalan hinungdan nga nag-ekis og nabangga mga alas 11:20 sa gabii gawas pa nga apektado sab og ilimong makahubog ang biktima atol sa insidente.

Nilanding usab sa susamang tambalanan si Jesus Liberanes, taga Dansolihon, ning siyudad sa Cagayan de Oro.

Gikan pa ang biktima sa iyang trabahoan sa Bukidnon mga alas 10:00 sa gabii dihang gisubay ang dalan ug nabati ang kusog kaayo nga hangin.

Kalit lang natumba ang usa ka punoan sa kahoy tunga sa dalan hinungdan sa pagkabangga niini.

Nilagpot ang motorsiklo samtang samaran ang ulo sa biktima gawas pa nga nakaangkon og grabeng bun-og sa lawas.

Sa pagsulat ning balita si Gacia giduso sa Cagayan de Oro Medical Center, samtang ang duha ka mga biktima nagpabilin pa sulod sa NMMC ug padayong giobserbahan. (SVB)