DILI ikalimod ang pagsaka sa krimen sa mga kabataan sama sa pagpangawat, pagpanguot labina ang makita daplin sa kadalanan nga magsige og simhot sa rugby sa pipila ka dapit ning siyudad sa Cagayan de Oro.

Namatikdan nga kasagaran sa mga kasong pagpangawat, pagpangransak ug uban pa nga matala sa presintuhan malambigit kining mga batan-on.

Pipila kanila gipangsikop sa kapolisan kung masapon apan buhian lamang tungod kay aduna man nagpanalipod kanila nga balaod nga mao ang RA 9344 kon Juvenile Justice Act diin kahinumduman nga kasagaran sa mga pulis dili pabor sa naasoyng balaod.

Si Police Inspector Buenaventura Reyes, hepe sa Police Station 2 (PS2) sa Cogon nibutyag sa Sun.Star SuperBalita nga kung aduna silay nasikop nga mga bata, deretso kining i-turn over sa Department of Social Welfare and Development (DSWD) o ubos niining center nga mao ang Tahanan ng Kabataan (TNK).

Apan usa ka personahe gikan sa Tahanan ng Kabataan diin kasagaran sa mga bata dad-on alang sa kostudya niingon sa Sun.Star SuperBalita atol sa pakighinabi nga dili ikalimod nga pipila sa mga bata ang maglayas sa ilang kostudya ug magbalik gyod sa dalan labina nga paghuna sa maong mga bata gipriso sila sa lugar.

Nasayran nga ang mga ginikanan usa sa labing problema tungod kay kulang sa giya sa paghatag sa panginahanglan sa ilang mga anak.

Gani ang TNK wala nagkulang sa paghatag og giya ngadto sa mga kabataan, padayon ang pagahatag og mga programa ug serbisyo ngadto sa mga bata.

Apan pipila niini magsige og balik-balik sa center tungod kay magbalik balik man sa paghimo sa krimen panahon nga makagawas.

Nasayran nga adunay 27 ka mga bata ang nahimutang sa TNK sa klase-kalseng krimen nga nahimo sama sa rugby, pagpanguot, pagpangawat ug uban pa tungod kay pipila kanila gigamit sa mga hingkod nga maoy mohimo sa krimen.