USA ka lalaki nga dunay kasong lugos gidakop sa mga pulis didto sa lungsod sa Kiblawan, Davao del Sur.

Gitunol sa kapulisan ang warrant of arrest sa suspek nga nailhang si Joel Alvior, 26, ulitawo ug lumolupyo sa Barangay Balasiao sa maong lugar, mga alas 10:20 ang takna sa miaging gabii.

Si Senior Inspector Ferdinand Casiano, hepe sa kapulisan, maoy nangulo sa pagsikop sa suspek human gimando ni Judge Carmelita Sarno-Davin sa Branch 19 sa Regional Trial Court (RTC) didto sa siyudad sa Digos.

Wa makasibat ang suspek human naabtan sa kapulisan ug gipahibawo nga ang iyang kaso nakadoket sa criminal case number FC 28 (2005).

Gireklamo og pagpanglugos ang suspek mao nga gipadlak dayon siya sa kapulisan sa selda ug di sab makaangkon og temporaryong kagawasan sanglit way piyansa ang iyang kaso.

Hinuon, malinawon nga nikuyog ang suspek sa kapulisan ug gihuwat na lamang nila ang sunod nga lakang subay sa mando sa korte.

Kapulisan wala na mihatag og dugang detalye kung kinsa ang nabiktima sa suspek nga maoy nipasaka og kaso. (Dondon Dinoy)