USA ka amahan nadala sa ospital human gipusil sa uyab sa iyang anak nga dalaga didto sa Barangay Cuambogan, dakbayan sa Tagum, pasado alas 12:15 sa kaadlawon niadtong Miyerkules.
Nailhan ang biktima nga mao si Ricardo Compra, 43, molupyo sa susamang barangay, samtang ang suspek mao si Rodrigo Monsanto, 45, usa ka negusiyante, ug molupyo sa Purok 6, Barangay Katipunan, lungsod sa Compostela, Comval Province.
Sa report gikan sa Tagum City Police Station, nasayran nga samtang didto sa Purok Sacred Heart sa maong barangay si Ricardo, kalit miabot ang suspek nga si Rodrigo ug gipusil siya gamit ang wa pa matinong kalibre sa armas.
Naigo ang biktima sa nagkadaiyang parte sa iyang kalawasan ug daling gidala sa Bishop Joseph Reagun Hospital.
Ang suspek misibat sab dayon sakay sa usa ka Honda TMX nga motor human sa pagpamusil.
Sa gihimong pakisusi nasuta nga ang suspek uyab sa anak nga dalaga sa biktima nga si alyas An-an.
Ang suspek ug ang anak nga dalaga sa biktima giingong nag-ipon na.
Kapulisan sa dakbayan sa Tagum, mihimo na og dugang imbestigasyon sa hitabo. (Marvin Pineda)