USA ka lalaki namatay human gitabangan og dunggab sa magsuon didto sa Purok 6, Sityo Mindahila, Barangay New Visayas, lungsod sa Montevista, Comval Province, Martes sa gabii.

Nailhan ang biktima nga mao si Pablito Aballa, 41, alyas Teting, ug molupyo sa susamang dapit.

Mga suspek nailhan nga mao ang magsuong Nonoy ug Bobong Nicor, ug molupyo sa maong lugar.

Sa report gikan sa Comval Province Police Provincial Office nasayran nga pasado alas 7:00 sa gabii, nag-inom matud pa ang biktima ug magsuong suspek sa usa ka imnanan sa maong lugar.

Apan tunga-tunga sa ilang panag-inom, nagkalalis ang mga suspek ug ang biktima human wa nagkasinabtanay sa dihang nalango na sa makahubog nga ilimnon.

Ang lalis misangko sa pagdunggab sa magsuon ngadto sa biktima gamit ang ilang tagsa-tagsa ka kutsilyo.

Ang biktima nahiagum og daghang mga samad sa kalawasan hinungdan sa iyang hinanali nga kamatayon.

Human sa pagpanunggab, mga suspek daling misibat padulong sa wa matino nga direksyon.

Narekober sa mga miresponding sakop sa kapulisan ang usa ka kutsilyo nga maoy gituohang gigamit sa mga suspek, usa ka kalo ug tsinelas nga gipanag-iyahan sa suspek nga si Nonoy.

Kapulisan sa lungsod sa Montevista mihimo na karon og dugang imbestigasyon sa pagpanunggab.

Samtang gilusad na sab ang manhunt operation aron sa paggukod sa duha ka mga suspetsado. (Marvin Pineda)