GRUPO ni Kumander Fermin Maestro sa 105th Base Command sa Moro Islamic Liberation Front (MILF) maoy gitudlo nga maoy misunog sa 97 ka mga balay sa mga molupyo sa probinsiya sa Maguindanao.

Sigun sa taho gikan sa 6th Infantry Division sa Philippine Army, nga banda alas 11:00 sa gabii, Hulyo 13, gihasi sa gibana-bana nga 200 ka mga rebeldeng MILF kinsa gipangulohan ni Kumander Maestro, ang Barangay Barurao, Sultan Sabarongis pinaagi sa pagpabuto sa ilang mga armas.

Tungod sa kahadlok, nagkatibulaag ang mga sibilyan sa pagpanagan paingon sa luwas nga dapit.

Una mibiya ang grupo ni Maestro, ilang gisunog sa 97 ka mga bay sa mga molupyo sa maong dapit.

Gibutyag ni Maguindanao Police Provincial Director Alex Lineses nga duol lamang sa detachment sa 45th Infantry Battalion sa Philippine Army ug police station ang maong dapit nga gihasi apan wala silay nahimo gumikan sa kadaghan sa mga rebelde.

Matud ni 6th ID Chief Colonel Benjamin Hao nga gitakda na nilang mopasaka og reklamo ngadto sa GRP Ceasefire Committee batok sa MILF.

Apan giklaro ni MILF Vice-Chairman for Political Affairs Gadzaali Jaafar nga walay kalabutan ang liderato sa MILF sa maong kagubot gumikan kay personal nga away kadto tali nila ni Kumander Maestro ug kanhing Sultan Sabarongis Vice Mayor Sukarno Badal ug naangin lamang ang mga sibilyan.

Milihok na ang GRP/MILF Ceasefire Committee, uban ang International Monitoring Team (IMT) aron resulbahon ang bingkil sa nagsumpaki nga grupo. (Edgardo Fuerzas)