USA ka drayber sa traysikel ang namatay human gipusil sa alas 2:40 sa hapon niadtong Martes didto sa siyudad sa Kidapawan.
Nailhan sa kapulisan ang biktima nga mao si Nathaniel Sayago, 44, minyo ug molupyo sa Barangay Magsaysay sa maong siyudad.
Gibutyag ni Kidapawan City Police Director Chino Mamburam nga naglingkod ang biktima sa iyang traysikel samtang naghulat sa iyang asawa nga namalengke sa merkado publiko sa diha nga kalit nga giduol sa duha ka wala mailhing suspetsado ug gipusil gamit ang kalibre .45 nga pistola.
Patay gilayon si Sayago nga naigo sa iyang tangkugo ug milapos sa ulo samtang ang mga mamumuno dali nga misibat sakay sa XRM nga motorsiklo paingon sa wala matino nga direksyon.
Matud ni Arlyn, nga una gipatay ang iyang bana, nagsulti siya nga dunay mga tawo nga naghulga sa iyang kinabuhi.
Giangkon ni Mamburam nga hangtud karon blangko pa sila sa tinuod nga motibo sa pagpatay sa biktima.
Gitahasan sab ni Mayor Rodolfo Gantuangco ang kapulisan nga tutukan pag-ayo ang maong kaso aron madakpan ang mga suspek. (Edgardo Fuerzas)