HUMAN nasakmit sa mga otoridad ang tunga sa milyon ka pesos nga shabu niadtong Sabado, nabalaka karon ang bise mayor nga basin dunay shabu laboratory dinhi sa siyudad sa Davao.

Si Bise Mayor Rodrigo Duterte nagpadayag sa iyang kabalaka human nasikop ang 29 ka mga tawo ug nasakmit sa daghang shabu didto sa Purok 8, Barangay 31-D Poblacion ug Purok 1, Barangay 76-A, Bucana niadtong Sabado.

Ang pahayag sa bise mayor iyang giluwatan atol sa iyang progarama nga "Gikan sa Masa, Para sa Masa" didto sa Sangguniang Panlungsod niadtong Martes.

Si Duterte nakigkita dayon sa mga opisyales sa Philippine National Police (PNP) ug Philippine Drug Enforcement Agency (PDEA) aron hisgutan ang maong suliran.

"Last night, nagkita kami ni Vice Mayor Rodrigo Duterte and I gave him a short briefing on illegal drugs activities in Davao City," ni PDEA 11 regional director Roybel Sanchez kagahapon dihang gipakisayran sa Superbalita.

Si Sanchez nagbutyag nga iyang gipahibalo ang bise mayor kung diin gikan ang mga shabu nga ania gibaligya sa siyudad.

"Sinabi ko sa kanya na galing ang mga ito sa Cotabato City at sinabi ko rin sa kanya kung paano nila ito pinuslit from Cotabato City to Davao City," pung ni Sanchez.

Ang maong opisyal nagkanayon nga nagpahimulos ang mga drug pushers sa kahigayonan nga dinhi nila ibaligya ang mga druga tungod kay malambuon ang siyudad sa Davao.

"Nag-take advantage itong mga drug pushers dahil developed masyado ang Davao City," ni Sanchez.

Si Sanchez nagbutyag nga ila sab nahisgutan ang kabalaka ni Duterte nga basin dunay shabu laboratory dinhi sa siyudad.

"So far, wala pa namang reported na shabu laboratory pero magsasagawa kami ng pusposang monitoring," pahayag ni Sanchez.

Ang Criminal Investigation and Detection Group (CIDG) dili makasulti kung duna o walay shabu laboratory sa siyudad apan giingon nga gikinahanglan ang makuting pagpaniid.

"Right now, hindi ko masabi na positive or negative. But as far as we are concerned, the illegal drugs came from Cotabato City," ni CIDG 11 Director Generoso Bonifacio dihang gipangutana kagahapon sa SuperBalita.

Si Bonifacio maoy nangulo sa raiding team nga misikop sa 29 ka mga tawo niadtong Sabado. Sa mga dinakpan, 22 kanila ang gipailawom sa imbestigasyon ug drug testing sanglit wala sila maapil sa search warrant.

Nasikop tungod kay sila ang gitumong sa search warrant ug dunay nakuha nga shabu mao sila Robelyn Remulta, alyas Bebeng, 28; Marcelita Adin, 33; Naima Butocan, alyas Butching, 24; Pidong Bandera, alyas Pidong, 57, minyo, sari-sari store owner; Amelita Bayabao, 25, asawa ni Samad; Salazar Bayabao, alyas Kusa, 23, minyo, pulos nagpuyo sa Purok 8, Barangay 31-D Poblacion, ning siyudad.

Sa maong ronda, nakaikyas gikan sa mga otoridad si Samad Bayabao (bana ni Amelita) hinungdan nga gipangita siya karon sa mga sakop sa CIDG 11.

Ang silingan sa magtiayong Bayabao nga si Sarah Tausing, 34, minyo, gisikop sab sa kapulisan tungod kay naghupot siya og 16 ka pakete nga shabu.

Si Bonifacio nagpasidaan kang Samad nga moampo nalang sa mga otoridad ug dili na niya paabuton nga sikopon siya human mapakanaog ang warrant of arrest.

"Dapat mag-surrender na siya," ni Bonifacio kinsa mipasabot nga kung himuon kini sa suspetsado dili na siya mahasol sa pagtago-tago. (AD)