USA ka dalagita personal nga midangop sa Talomo Police Station aron ireklamo ang iyang agalon kinsa iyang gipasanginlan nga milugos kaniya sa makadaghan nga higayon dinhi sa siyudad sa Davao.
Ang biktima nangayo og tabang sa usa ka pulis human siya nakaikyas gikan sa mga kamot sa iyang agalon nga iyang giila nga apo ni kanhi Maguindanao governor Andal Ampatuan Sr.
Ang biktima gitago sa pangalan nga Nene, 17, nagbutyag sa kapulisan nga gilugos siya sa suspek nga si Don Israel Ampatuan Moning Asim sulod mismo sa panimalay niini niadtong Hulyo 2, 5 ug 7, 2010.
Human masayri ang nahitabo sa biktima, mga sakop sa Talomo Police Station miadto dayon sa gipuy-an sa suspetsado aron sikupon apan wala na siya didto sa ilang panimalay.
Si Police Chief Inspector Joselito Loriza, hepe sa Talomo Police Station, nagbutyag sa Sun.Star SuperBalita nga ang suspetsado nagpuyo sa Florez Village, Bangkal, Barangay Talomo Proper.
"According to the victim, ang suspect naay duha ka anak. Nahimo siyang Sangguniang Kabataan Federation president ug former board member sa Maguindanao province," matud ni Loriza.
Si Loriza nagbutyag nga ila nang giandam ang kasong rape ug act of lasciviousness batok sa giingong apo ni Ampatuan Sr.
"So far, amo pang gina-interview ang victim ug amo siyang dalahon sa Balay Dangupan. Human niini, amo nang i-file ang kaso through regular filing sa court," pahayag ni Loriza.
Ang biktima giingon nga usa na ka bulan nga nahimong katabang sa suspetsado ug lumad nga taga Barorao, Sultan sa Barungis, Maguindanao province. (Alger Dura)