Barrita: Duelo

USA ka deputy regional director sa Philippine Drug Enforcement Agency (PDEA) 7 gipahamta­ngan sa silot nga pagkasuspenso sud sa unom ka buwan ug usa ka adlaw tungod sa iyang pagpang­hagad og duelo sa usa ka Sugbuanong reporter.

Ang gihagad og duelo mao si Guam Logronio, reporter ning maong pamantalaan, Sun.Star Superbalita Cebu, ug sa radio station DYSS, nga igo lang nangutana sa maong opisyal kon unsay iyang ikasulti mahitungod sa taho nga nironda ang mga sakop sa PDEA 7 nga way search warrant.       

Sa unang panahon, ang panag-away husayon pinaagi sa duelo, sa pagpanagtigi o panag-away hangtod sa kamatayon ginamit ang armas. Dunay mga lagda kini sama sa armas nga gamiton, pusil ba o kutsilyo. Ang uban nga maggamit ogkutsilyo maghigot aron way makadagan pahilayo. 

Mahimo pa ba kini karon?

Di na. Ubos sa Article 260, Revised Penal Code, gisilotan kadtong mosalmot sa usa ka duelo. Kadtong makapatay sa iyang kontra sa duelo pahamtangan sa silot nga reclusion temporal kon pagkabilanggo gikan sa 12 ka tuig ug usa ka adlaw ngadto sa 20 ka tuig.

Kon igo lang masamdan ang iyang kontra, paham­tangan siya sa silot nga tukma sa krimen nga physical injuries. Bisan tuod dunay presumption of intent to kill sa niapil sa usa ka duelo, giklaro sa balaod nga konigo lang masamdan, ang silot nga ipahamtang mao ang silot sa physical injuries. Sa ato pa, gitangtang ang presumption of intent to kill. 

Kon nagduelo silang duha apan way namatay o kaha nasamdan, pahamtangan sila sa silot nga arresto mayor kon pagkabilanggo gikan sa usa ka buwan ug usa ka adlaw ngadto sa unom ka buwan. Ang ilang mga seconds kon mga assistant pahamtangan sa silot isip mga accomplices.

Samtang ubos sa Article 261, Revised Penal Code, kadtong manghagad og duelo pahamtangan sa silot nga prision correccional kon pagkabilanggo gikan sa unom ka buwan ug usa ka adlaw ngadto sa duha ka tuig ug upat ka buwan.

Lakip sa gisilotan niini mao kadtong mang­hul­hog sa laing tawo sa pagpanghagit og duelo o pagdawat sa hagit sa duelo. Apan sa usa ka kaso (People v. Tacomoy), ang usa ka tawo nga nanghagit og dinunggabay apan wa modayon pagkakita nga dunay kauban ang iyang gihagit, gikonbikto lamang sa krimen nga light threats kon pagpanghulga imbis sa krimen nga challenging to a duel.    

(Ang atong paghisgut-hisgot mahitungod sa balaud madungog na matag karon ug unya sa mga tampo nga dunay punto legal ngadto sa tulomanon nga “Alang Kanimo Kapuso” nga gisibya  gikan sa ala-una ngadto sa alas dos sa hapon sa sibyaan DYSS Superadyo sa RGMA Network.)