WALA gayod ko masayop sa akong pasida-an sa atong lindog sa Sun.Star Cebu niadtong Lunes kabahin sa pamahayag sa usa ka 19 anyos nga dalaga kinsa saksi sa pag-ambush patay kang magpapatigayon Manuel Ting. Akong gipahimangno daan nga dili na ako matingala nga ma-usab ang pamahayag sa maong babaye sa panahon nga matultulan ug mabutang ubos sa kustodiya sa kapulisan.
Ang maong babaye nakakita sa suspetsado nga mibanhig kang Ting gumikan kay diha kini nagbarog-barog sa atubangan sa bakery nga iyang gitrabaho-an. Mi-angkon siya sa dihang na-interview ni dySS reporter Guam Logrono pipila ka minuto human sa maong hitabo. Sa dihang gi-adto ni Guam sa ilang panimalay niadtong miaging semana ug gipakita sa hulagway ni Ruel Velez, ang gitumbok sa pulis nga mibanhig kang Ting nga napatik sa pamantalaan, mi-ingon ang saksi nga dili si Velez ang iyang nakita.
GISUBMARINO
Aw, wala gayod ako masayop kay gisubmarino na sa kapulisan ang maong babaye ug gipapirma og affidavit nga nanghimakak sa taho ni Guam. Matod sa babaye nga wala siya mo-ingon ngadto ni Guam nga dili si Velez ang mamumuno ni Ting. Matod niya nga nagduha-duha siya kay wala kaayo siya makaklaro sa dagway sa tawo nga mibanhig ni Ting.
Lisod na tuhuan ang maong babaye kay naa na kini siya sa custody sa kapulisan ug posibling nadiktahan o nahiloan na ang iyang huna-huna. O ba kaha dili na siya gusto pa nga maduhig siya ning maong kaso. Makasabot pod ta ani niya kay probinsiyana ra intawon. Wala naman gani mobalik og trabaho sa bakery nga iyang gitrabahoan human sa pag-ambush ni Ting gumikan sa kahadlok.
USAB-USAB
Usab-usab intawon iyang pamahayag. Niadtong gibanhigan si Ting, misugilon siya ni Guam nga naka-ila siya. Sa dihang gipakita sa hulagway ni Velez, mi-ingon siya nga dili mao. Karon, human siya kuhaa sa kapulisan, mi-ingon siya nga wala na siya makaklaro. Dali kaayong nakabalitok. Apan gawas sa ginikanan nga nakasaksi, ang kapitan sa barangay diha man usab og makatestigo sa pamahayag sa babaye.
Pero sama sa akong gika-ingon nga dili angayan mabalaka ang kapulisan ning maong saksi. Kay hangtod nga dili siya mo-execute og affidavit walay gibug-aton kining iyang pamahayag sa media. Ang bantayan lang sa kapulisan nga dili makuha isip saksi kining maong babaye sa depensa. Bahala na og dili siya motestigo pabor sa prosecution basta dili lang pod siya motestigo sa depensa. (bobby@sunstar.com.ph)