DILI fall guy si Ruel Velez. Kini maoy version sa kapulisan. Sa ato pa, si Velez, alang kanila, mao gayud ang triggerman sa negusyanting si Manuel Ting sa niaging Hunyo 22.

Pasakaan siya sa kaso ngadto sa korte aron kon mapamatud-an nga sad-an tukmang silot ang ipahamtang.

Niini ang kaso makonsiderar gilayon nga solved na. Accomplishment sa mga tinugyanan sa balaod.

Apan diay usa ka tindera sa bakery diin diha gayud sa atubangan nahitabo ang pagpamanhig, sa wa damha, mipabuhagay nga di si Velez ang mipatay kang Ting.

Ang iyang pamahayag iyang gibase sa nakita niyang hulagway sa pamantalaan nga gidala ni Sun.Star Superbalita correspondent ug dySS reporter Guam Logroño sa niaging Biyernes sa udto.

Sa taho ni Logroño, (kon kini di bakwi-on sa babaye ang iyang unang pamahayag) giangkon niini nga diha siya sa hitabo ug

nakakita gayud siya sa nagpatay.

Kining pagtumaw sa managlahing senaryo mahimong makahatag og pagduda ngadto sa mga kapulisan, apan sa samang higayon, makahatag usab kanila og laing giya.

Mahimo usab kining makapaaghat sa mga kapulisan sa pagpangita og laing anggulo aron gayud makit-an ug mataral sa hukmanan ang tinud-anay nga mga mamumuno.

Kay kon dili, subo palandungon nga tingali sa mata lang sa publiko mahimong usa ka accomplishment o kalampusan sa kapulisan ang ilang nahibaw-an - apan sa hilom nagmaya ug nagkatawa lang ang mga tinud-anay nga mga kriminal.

Unfair sa gipasanginlan, unfair usab sa pamilya sa biktima.