GIPANGHINAOT ni Tinago barangay konsehal Joel Garganera nga ipatuman na gyud sa siyudad sa Sugbo ang tinud-anay nga towing ordinance ubos sa pamunoan ni Mayor Michael Rama.

Nakadayeg ra usab kini sa gipakitang mga lihok karon sa bag-ong mayor nga giingong nihimo sa iyang kaugalingong mga desisyon ug wa magpadiktar.

Gani sa iyang pamunoan ipatuman gyud ang saktong lagda sa towing ordinance, nga sa kanhi administrasyon kusganong gisaway ug gireklamo sa mga motorista kay giabusahan sa towing companies.

Sa administrasyon ni Rama, himuon lang ang pag-tow sa mga sakyanang ilegal nga nag-park atol sa peak hour sa adlawan.

Panahon sa kagabhion, kadto lang mga sakyanang makababag sa mga emergency vehicle sama sa ambulansya ug firetruck ang guyuron.

Matod ni Citom chairman Sylvan Jakosalem nga kadtong mga sakyanang ilegal nga nag-park apan wa makababag sa trapiko isyuhan lang og citation ticket ug dili gyud i-tow ang ilang sakyanan.

Ang pagpatuman sa towing himuon lang base sa "need-to-tow basis."

"That should be the case. Kon 2 a.m. i-tow, naa bay traffic anang orasa? It's only in Cebu," nagkanayon si Garganera, usa sa mga opposition leader ug maoy nangulo sa pagsang-at og reklamo batok sa siyudad tungod sa gihimong towing operation ubos sa pamunoan ni kanhi Mayor ug karong Cong. Tomas Osmena. (CPL)