LIMA pa ka mga sakop sa Regional Public Safety Battalion (RPSB) ang gisulod sa Intensive Care Unit (ICU) sa South General Hospital human nangaangol dihang nangaigo sa kilat niadtong Martes sa udto sa Sityo Camansi, Brgy. Lamakan, Sibonga, Sugbo.

Si Chief Supt. Lani-O Nerez, director sa kapulisan sa rehiyon 7, nagkanayon nga ang lima ka personnel pabiling nakasinatig mga pagpamanhod sa ilang tiil ug kalawasan.

Hinuon si Nerez niklaro nga stable ang mao nga mga pulis ug gibutang lang sila sa ICU aron ma-monitor ang ilang panglawas sanglit toa ang mga kahimanan nga magamit gilayon sa dinaliang panginahangalan sa mga biktima.

Apan giklaro ni Nerez nga dunay pito ang gibutang sa medical center sa Camp Sotero Cabahug sa Cebu City Police Office (CCPO) ug wa nay kabalak-an pa ang ilang panglawas.

Matod pa ni Nerez nga conscious hinuon ang lima nga naa sa ICU kinsa gi-monitor pag maayo sa mga doctor.

Giklaro niini nga walay lapso nga nahimo ang commander nga nagdala sa 321 ka mga RPB diin 18 niini nangaigo sa kilat dihang nagpahigayon na unta boodle fight atol sa pagbunok sa buwan.

Sumala pa ni Nerez nga di gyud matag-an ang panahon labi na sa pagsugat sa kainit ug bugnaw nga maoy maka-ingon sa pagkilat.

Gipadayag niya nga atol sa insidente gipa-cancel gilayon niya ang field training exercise ug kagahapong adlawa gipabalik ug gipapangitag lugar nga di open space nga di sagad maigo sa kilat kon dunay uwan.

Gani atol usab sa insidente nagamit sa mga police ang ilang nakat-unan, di lang sa lecture kon di sa actual nga pagrespondi sa bisan unsang panghitabo diin sila na mismo ni-rescue ug nangitag pamaagi kon usay ilang buhaton.

Napahibalo na hinuon ni Nerez si PNP Director Jesus Versoza Jr. ug nipasalig kini nga sila maoy mo-abaga sa tanang galastuhan sa hospital sa mga biktima.

Maka-gradute hinuon ang mga nangaagol sa insidente. (Guam P. Logroño)