MGA sidewalk vendor sa sityo Lawis, barangay Lorega-San Miguel, siyudad sa Sugbo ang gireklamo sa mga residente kay maoy nakahuot sa agianan ug sila nabalaka nga di makaagi ang firetruck kon dunay mahitabong sunog.

Usa ka 60-anyos nga residente ang niduaw sa Sun.Star Superbalita aron kini ireklamo kay giingong usa ka tuig na kini niyang gitaho sa barangay apan hangtod karon wa gyud kini aksyuni.

"Bisag karomata maglisod og agi kay both sides gi-occupy vendors. Sa una maagian gud na og panel, karon nigamay na gyud ang dan delikado kaayo kon nay sunog," reklamo pa sa residente nga nihangyong di lang siya nganlan sa kahadlok nga kontrahan sa mga silingang naninda.

Si Kapitan Fritz Herrera nga gitawagan sa Sun.Star Superbalita niangkon nga dugay na nga gireklamo ang paghuot sa dan apan kini di gumikan sa presensya sa mga vendors kay bata pa siya naa na ang mga vendors sa ilang pwesto.

Nihuot lang ang dan karon tungod sa pag-extend sa mga tapangko ug kini maoy iyang aksyunan ug di lang papahawaon ang mga vendors.

Gitin-aw hinuon ni Herrera nga ang maong dan di gyud sab angay agian og mga sakyanan kay di man kini main road. "Ato lang sang iagi og diplomasya, atong hangyuon nga kuhaan ilang tapangko," nagkanayon si Herrera, kinsa nisaad nga himuon kini sud sa daling panahon.

Ang aksyon ni Herrera pinasubay usab karon sa gihingusgang kampanya ni Mayor Michael Rama nga hawanan ang mga dapit nga di angay butangan og mga sidewalk vendors ug displinahon kadtong uban pinaagi sa pagpasunod kanila sa saktong gidak-on sa ilang pwesto. (CPL)