NILANDING sa balay tambalanan ang magtiayon human nabangga niadtong Miyerkules mga alas 4:00 sa hapon sa siyudad sa El Salvador, Misamis Oriental.

Gidala pagdali sa Northern Mindanao Medical Center ning siyudad sa Cagayan de Oro sila si Diosdado Pepito, 49, minyo ug asawang si Rosalina, 49, sa susamang dapit, pulos mga residente sa siyudad sa Iligan.

Sa gihimong pakighinabi sa Sun.Star Superbalita ngadto kang PO1 Jose Gabule sa El Salvador Police Station, nasayran gikan niini nga gikan pa sa siyudad sa Iligan ang magtiayon nga paingon unta ning siyudad sa Cagayan de Oro.

Apan paghidangat dapit sa Shrine of Divine Mercy kalit lang miguwa ang usa ka motorsiklo nga gimaneho ni Loue Jay Cabigkis, kuyog ang backrider niining si Ni¤a Tabiano.

Nagsungag ang motorsiklo hinungdan sa pagkalagpot sa mga sakay niini ug pagkabunal sa ulo. Ang magtiayon dali nga gidala sa NMMC. Hinuon luwas na sa makuyawng kahimtang ning panahona.

Nakangkon gihapon og bun-og sa lawas sila si Cabigkis ug Tabiano atol sa insidente apan wala na nagpadala sa balay tambalanan.

Ang kaso kasamtangan nga giatiman sa Traffic Investigator sa El Salvador. SVB