GIBATI og kahadlok ang usa ka babaye human gitulis kagahapon mga alas 2:45 sa kadlawon sa Kauswagan Highway ning siyudad sa Cagayan de Oro.

Nagpatabang sa Police Station 4 (PS4) sa Carmen si Erlinda Verallo Eglamo, 48, lumad nga taga Tuburan, Zamboanga del Sur.

Gisaysay sa biktima sa kapolisan nga samtang nagtindog sa Kauswagan ning siyudad duha ka mga lalaki nga sakay og motorsiklo ang nihunong tungod sa iyang gitindogan.

Mihublot og wala matinong pistola ang usa ka lalaki ug mition sa biktima dayon pangutana kung nakaila ba sa iyang gipakita.

Gibira dayon sa kauban niini ang iyang bag ug deretsong mipadagan sa motorsiklo.

Tungod kay walay kaila ang biktima niadtong tungora unang nagpahatod sa Police Station 2 (PS2) sa Cogon si Eglamo ug gisaysay ang nahitabo kaniya. Giduso sab sa mga polis ang biktima ngadto sa PS4.

Nasayran nga paingon na unta nga mouli ug naghulat sa masakyan ang biktima dihang nahitabo ang insidente.

Nakuha sulod sa bag ang iyang cellphone uban sa mga sinina, IDs ug uban pa nga mga personal nga gamit.

Tungod sa kahadlok sa gibati sa biktima wala na nadumduman niini ang mga hitsura sa mga suspetsado labina dili sab pamilyar sa siyudad.

Ang kaso giimbestigahan karon sa PS4 alang sa pag-ila sa suspetsado.