WA BA kamo nahibung nganong dagha'g salapi ang menor de edad ninyo nga anak?
Si vice mayor Rody Duterte nagpahimangno sa mga ginikanan niadtong miaging adlaw nga bantayan ang ilang mga anak tungod kay dunay senyales nga naghitak na sab ang gidiling druga dinhe sa syudad.
Nahipos ang taho nga mga drug dealers naggamit sa pipila ka mga bata sa pagbaligya sa gidili nga druga.
Natahap si vice mayor Duterte nga mga negosyante sa druga nakamuntar na og laboratoryo sa druga dinhi sa dakbayan.
Mga otoridad nagronda niadtong miaging adlaw sa mga barangay 31-D ug 76-A hinungdan nga nasignit ang 29 ka mga tawo sa gituohang tindahan og shabu.
Nasayud kitang tanan unsa ang kadaut nga mahimo sa makuyaw nga druga ngadto sa mga biktima --kadaghanan mga batan-on.
Mga batan-on nga maadik sa druga namiligro ang kaugmaon. Tulo ka M ang padulngan sa mga naadik sa druga -- mental, morgue ug menteryo.
Tungod niini, ang pagtabang sa pagsumpo sa pagkuyanap sa druga dili lamang tahas alang sa mga pulis apan sa mga ginikanan usab.
Kinahanglan bantayan sa mga ginikanan ang ilang mga anak kun wa pa ba sila masa-ag.
Apan dili sab kay mga bata lang ang angay bantayan kun dili apil na usab ang pipila ka mga ginikanan. Hayan dunay mga ginikanan nga mao pa mismo ang magsugo sa ilang anak sa pagbaligya og druga.
Sa laing bahin, ato gipanghinaut nga ang sunod madakpan sa mga otoridad mao kadtong dagkong mamsa nga nalambigit sa negosyo sa druga ug dili lamang kadtong mga ultimo.