WALO ka mga pasyente, usa kanila mao ang 5 anyos nga batang babaye, gitambalan sa Davao del Sur Provincial Hospital (DDSPH) tungod sa dengue.
Gidali pagtabang ang batang si Princess Coronado sanglit kinahanglan siyang abonohan og dugo kun "fresh frozen plasma" tungod kay nagdugo na siya.
Ang uyuan sa biktima nga si Mark Dianzo, nagkanayon nga kalit nagsuka ang bata mao nga gisud dayon sa PEDIA Intensive Care Unit (ICU).
Laing pasyente sab nga si Mark Albaraccin nakabaton og pagpula sa lawas sa dihang gidala sa ospital apan matud sa mga doktor nga miarang na ang iyang kahimtang.
Ang iyaan sa biktimang si Aurelia Albaraccin nitataw nga niadtong Lunes lang nagsugod ang "on and off" nga kalintura sa bata.
Gideklarang epedemic na ang probinsiya sa Davao del Sur sanglit nilutaw sa rekord sa Provincial Health Office (PHO) nga 600 na ang nangasakit og dengue sukad sa buwan sa Enero hangtud sa kasamtangan.
352 ka mga pasyente ang gikan sa siyudad sa Digos, 91 sa mga lungsod sa Bansalan, 58 sa Malalag, 26 sa Sta. Cruz, 21 sa Magsaysay, 14 sa Sta. Maria, 13 sa Hagonoy, 12 sa Malita, 7 sa Sarangani, 4 sa Matanao ug 2 sa Kiblawan.
Sa ihap sa PHO, 9 na ka mga nasakit og dengue gikan siyudad sa Digos samtang 2 sa Bansalan ug 1 sa Malalag ang nangamatay.
"We have intensified our campaign, house to house na gyud para manghinlo gyud ang katawhan," ni Dr. Azucena Dayanghirang, PHO officer.
Niabot na sab gikan Manila ang mga epedemiologist aron motabang pangita og pamaagi ug pagtabang pagsulbad nga makontrola ang dugang pagkuyanap sa malaria ug dengue.
Hinuon, susihon pa sa PHO ang datos sa mga natakbuyan og malaria. (Orlando B. Dinoy)