USA ka lalaki ang grabeng naangol human nabuthan og bomba sa alas 6:50 sa gabii niadtong Miyerkules didto sa probinsiya sa Maguindanao.

Nailhan sa kapulisan ang biktima nga mao si Sabtula Akad Unte, 24, minyo, mag-uuma ug molupyo sa Barangay Poblacion, Datu Hooper Ampatuan.

Si Unte dali nga gisapupo ug gidala sa Cotabato Regional and Medical Center apan gibalhin siya sa mga sakop ni Cotabato City Police Director Willie Dangane uban ang Task Group Tugis ug Joint Task Force 12-Alpha ug gibalhin didto sa Camp Siongco Hospital sulod sa kampo sa 6th Infantry Division sa Philippine Army.

Sumala pa nga ang pagbalhin sa biktima gipasubay sa mando ni PNP-12 Regional Director Chief Supt. Felicisimo Khu human gitumbok sa mga otoridad si Unte nga mao ang nagdala sa bomba ug aksidenteng nabuthan sa diha nga iya na unta nga ibutang ang IED sa maong tulunghaan.

Apan giklaro sa asawa sa biktima nga walay kamatuoran ang akusasyon sa militar ug kapulisan.

Gibutyag ni Baicula nga samtang naglakaw ang iyang bana duol sa Labu-Labu Elementary School didto sa Sharief Aguak kalit siyang nabuthan sa wala matino nga bomba.

Apan gikompirma ni 6th ID Spokesman Colonel Benjamin Hao nga dunay mga testigo sila nga nagpamatuod nga si Unte maoy nagdala sa bomba ug siya ra sab ang tawo niadtong mga orasa sa entrance gate sa Labu-Labu Elementary School. (Edgardo Fuerzas)