NPA patay sa away

USA ka sakop sa rebeldeng New People's Army (NPA) ang napatay ug daghan ang samaron human sa nahitabong engkuwentro tali sa mga tropa sa 66th Infantry Battalion sa Philippine Army didto sa Barangay Tandawan, lungsod sa New Bataan, Compostela Valley province, pasado alas 4:00 sa hapon niadtong Miyerkules. 

Sa report gikan sa Compostela Valley Police Provincial Office nasayran nga sa dihang nadawat sa mga otoridad ang taho gikan sa mga molupyo sa nahisgutang dapit labot sa pagpangilkil sa mga rebelde sa Front Committee 20 ngadto sa mga kabalayan, daling miresponde ang mga sundalo sa 66th IB. 

Naabtan sa tropa sa gobyerno ang kapin 20 ka mga rebelde sa nahisgutang lugar ug nahitabo ang engkuwentro. 

Miabot sa kapin 30 minutos ang nahitabong pinusilay tali sa duha ka grupo una miatras ang mga rebelde padulong sa bukirong dapit sa maong lugar. 

Usa ang kompirmadong patay gikan sa hut-ong sa mga rebelde ug way gikatahong samdan o namatay sa mga sundalo.

Gikataho sab nga ubay-ubay ang samdan sa mga NPA tungod sa mga lama sa dugo nga nakit-an didto sa nahitabuan. 

Narekober gikan sa posisyon sa namatay nga rebelde ang usa ka M653 assault rifle (baby armalite). 

Sumala pa ni Senior Supt. Aaron Aquino, Compostela Valley provincial police office director, nga padayon pa nila nga giila ang napatay nga NPA. 

Nagtuo si Aquino nga posibling taas nga opisyal sa mga rebelde ang napatay sanglit naghupot siya og ta-as nga matang sa armas. 

Kasundalohan mihimo na karon og hot pursuit operation aron sa paggukod sa mga rebelde nga miikyas. 

Sigun sa taho ni 66IB commander Col. Roberto Ancan nga nadawat sa 10th Infantry Division ang taho bahin sa pangilkil mao nga milihok dayon ang mga otoridad.

"Reports of NPAs extorting money from residents have been persisting for about a couple of days and today we received specific information from residents on their exact location," sumala ni Ancan niadtong Miyerkules.

"Security operations will be continuously conducted by our soldiers for the people to have a secured community without the threat, intimidation and coercion by the NPAs under the absolute order of the CPP," pahayag usab ni 10th ID commander Maj. Gen. Carlos Holganza.

Si Holganza nagkanayon nga magpadayon ang operasyon sa kasundalohan sa tibuok rehiyon aron maseguro nga dili mabalda ang paghatud sa serbisyong sosyal sa gobyerno sa kabukiran.

"Similar operations are also being conducted region-wide to ensure the uninterrupted delivery of government services to the people and the implementation of much needed peace and development projects," ni Holganza. (MP/AD)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph