SA pagbuto sa isyu sa legalidad sa paghatag og separation pay nga P500,000 kang kanhi Department of Tourism Regional Director for Central Visayas Patricia Dawnie Roa gikan sa Mactan Cebu International Airport Authority isip pahinungod sa iyang 15 ka tuig nga panerbisyo sa pagka Board Member sa MCIAA, dali natong gitawag ang atensyon ni Assistant Visayas Ombudsman Virgie Santiago kinsa namahayag nga aduna nay disallowance ang Commission on Audit sa susamang mga gratuities sa mga government owned and controlled corporations (GOCCs)apan on appeal pa kini sa uluhang buhatan, mao nga aron kalikayan ang komplikasyon iyang gitawgan dayon ang mga auditor sa MCIA aron i-hold lang una ang pag-release sa tseke ngadto kang Roa hangtud nga dili pa matino ang ka valido niiini.
Apan nahimong kawang ug nada ang maong dinalian nga pahimangno gikan kang Maam Virgie sa buhatan sa Ombudsman kay dili na gyud mapugngan ang nag-umidong pagbati ni MCIA General Manager Danilo Francia nga ikahatag ang maong benepisyo ngadto kang Roa. Unya aron maseguro gyud ang katumanan niini, wala na paabuta pa nga si Roa ang mo-claim kay gipa "door-to-door delivery" ang tseke sa mismong panimay sa gipahinungdan nga si Roa.
Kining maong binuhatan dali usab kaayong giduphan ni Gobernador Gwen Garcia nga miyembro usab sa Board sa MCIAA kinsa midason nga adunay igong awtoridad ang Board sa paghatag ning maong gratuity kang Roa isip pagpasalamat sa iyang diniyos nga panerbisyo pinasikad sa Charter sa MCIAA ug sa Corporation Code of the Philippines.
Gisumbalik usab ni Gwen sa pagkwestyun ang mga sakop sa media nganung mao lama'y gipadak-an sa mga balita ang nahatag nga benepisyo ngadto kang Roa ug wa i-apil ang pag-alburoto sa mga empleyado sa ilang pagbasura sa Board sa ilang gipangayong usbaw sa bonus karong tuiga nga himoong P300,000 gikan sa P200,000. Maoy hinungdan nganong ang mga diskumpiyado ang mipalakaw dayon og mga estorya sa pagreklamo sa mga sakop sa media.
Kon atong himuong sumbanan ang Batakang Balaud, atong makita nga ang mga miyembro sa Kongreso kon ugaling mohimo og lakang sa pagpa-umento sa ilang suweldo ug mga benepisyo, kini mamahimo lamang ipatuman ug madawat sa termino sa mosunod nga mangatungdanan.
Kini tungod kay klaro ug dayag man kaayong self serving kun pagtagbaw da sa kaugalingon ang pag-unay unay ug pagregalo sa dagkong suhulan ug pribilihiyo nga dili lamang kontra sa lagda sa delicadeza ug saktong pamatasan, kini magbutang usab sa dili maayong kahimtang sa pundo sa gobyerno nga imbis adto mahipunta sa serbisyo publiko, adto na masud sa mismong mga opisyal nga nagbuot-buot sa pagtagbaw sa ilang kaugalingon.
Ang gahum kun awtoridad gikinahanglan alang sa pagpatuman sa kahapsay ug katunhay apan kon kini mosud na gani sa ulo sa mga gitahasan ug moresulta na ngadto sa paghubog sa kaugalingon.
Kini mamahimo nga tinubdan sa pag-abuso ug pagpatuyang kay mao na may nahipatik sa alimpatakan nga wala nay arang kanilang mga gamhanan. Hinaut matag karon ug unya dili magpalabi sa pagpagawal kay ang gihuptang katungdanan igo lamang gipahulaman sa katawhan ug kini dili alang sa dayon kun dili lumalabay lamang.