TING-UWAN na sab. Mao ning panahuna nga mosaka og maayo ang mga kaso sa dengue.

Dinhi sa dakbayan sa Sugbo, grabe ang pagsaka sa mga kaso kay miabot na gani og 112 porsyento ang pagsaka sud lang sa unom ka mga buwan.

Updates on President Benigno Aquino III's presidency

Tinuod mimenos ang gidaghanon sa nangamatay kon itandi sa miaging tuig. Apan bisan pag unsaon, ang numero nagpakita nga misaka og maayo ang gidaghanon sa nangasakit ining kagaw nga dala sa lamok.

Kini di maayo nga timailhan tungod kay posibleng nahitabo kini tungod sa wa pagpakabana sa komunidad bisan sa subsob kaayong kampanya sa kagamhanan, labina sa mga ahensya sa panglawas.

Unsaon sab gud, naandan na gyud sa tawo nga molihok lang kon mao nay maigo. Kon wa pa gani maapektuhi, magmika ug mangyugpos lang.

Unya dali pa kaayong makabasol sa mga health official nga kuno kuwang sa pagpakatap sa impormasyon.

Ang mga impormasyon kalabot sa dengue dugay na kaayo. Unya simple ra baya ang buhaton nga bisan way grado makahibawo mobuhat.

Manglimpyo kanunay sa palibot.

Seguruon nga way nagpundong tubig nga kaitlugan sa mga lamok nga nagdala ning mao nga sakit.

Sagad sa pundohan sa tubig mao ang plastic containers, dahon, labina sa saging, flower vase, ligid nga wa na magamit, butanganan sa mga plato ug uban pa.

Kon hilantan ang mga bata ipahiling dayon sa mga doktor sa mga sentro nga maoy morekomendar kon gikinahanglan ba ang dugang tests.

Gikinahanglan ang pagpakabana ug ang pagpugong nga di kini moigo. Kanus-a ka pa man molihok, kanang uwahi na ang tanan?