MAPUGNGAN pa unta ang paghikog sa ulitawong guwang kon nabasahan pa sa iyang ig-agaw ang iyang suicide note nga gitunol.
Awahi na nga nabasa ni Agustina Villaver, hingkod,minyo nga taga Upper Mohon, Talisay City ang yellow pad nga gitunol sa biktima nga si Margarito Villaver,65 anyos.
Sa imbistigasyon sa mga sakop sa homicide section, wa dayon mabasahe ni Agustina ang suicide note tungod kay busy siya gumikan sa gitambungan niyang despidida party.
Kalit lang niabot si Margarito ug nitunol sa yellow pad ngadto sa iyang ig-agaw apan wa kini basaha ug gisud lang sa bolsa.
Human sa gitambungan nga kalihukan, nahinumdom si Agustina sa gitunol nga yellow pad sa biktima ug sa iyang pagbasa, diha pa niya nahibaw-an ang plano niini nga magpakamatay.
Gipahibawo na lang si Agustina nga nagbitay na ang patayng lawas ni Margarito sa payag niini pasado alas 10: 00 ang takna sa miaging gabii.
Way nakita ang kapulisan nga timailhan nga dunay foul play sa kamatayon sa biktima. (VLM)