8-anyos gibunalan, gibitay pa sa inahan

GIBITAY sa iyang inahan ang 8-anyos nga batang lalake gumikan sa kalagot nga nilayas sa ilang pinuy-anan sa miaging semana sa lungsod sa Barili, Sugbo.

Nahibaw-an ang gibuhat sa inahan human siya gisumbong sa mga silingan ug iyang mga anak.

Una na gani diay nga nilayas ang iyang 11-anyos nga anak nga babaye nga wa sab makaaguwanta sa iyang giingong kanunay nga panagmal.

Napriso si Linda ( tinuod ngan gipugngan), 30, kanhi katabang, human gipasakaan og kaso sa kapulisan nga kalapasan sa Sec. 10 Par. A sa Republic Act 7610 (other acts of child abuse).

Apan si Linda nga nahinabi sa Sun.Star Superbalita niangkon sa iyang pagdagmal sa iyang anak. Iyang gibunalan og lakip ang nawong, gigapos ang mga kamot ug gibitay sa sala sa ilang balay.

Si Linda nipasabot nga niadtong miaging semana iyang gisugo ang iyang anak nga lalake sa paghatod sa mga sinina sa maguwang niining 11 anyos kinsa nipuyo sa ilang silingan human molayas sulod na sa usa ka buwan.

Apan napungot siya sanglit sa miaging Sabado pa kini niya gisugo apan wa na kini mopauli.

Sa iyang pagpangita ngadto sa kabalayan sa mga silingan, iya ning nakit-an niadtong Martes nga didto mopuyo sa lain nilang silingan.

Sa iyang kalagot iyang gikuha ug gipapauli sa ilang balay ug pag-abot iya kining gikasab-an og maayo, gibunalan, ingon man gigapos og pisi una pa gibitay.

"Nagmahay ko kinsa gyoy inahan nga modapat og anak. Sa kalagot lang to nako. Wala ko kapugong sa akong kaugalingon sa pagpabadlong sa akong anak. Kadtong iyang samad sa kamot agi to sa pisi kay nagsigi man og lugnot," sumala pa sa inahan.

Matod niya nga iyang nadagmalan usab ang iyang 11 anyos nga anak babaye gumikan kay kanunay nagpabadlong sa pagsige og tan-aw sa telibesyon, mokuyog sa barkada nga buntag na nga mopauli sa ilang balay.

Iyang gibutyag nga upat ang iyang mga anak sa unang bana nga mag-uuma.

Nagpangidaron kini og 11, 8, 5, 2, anyos samtang mabdos usab siya karon og kapin sa duha ka buwan sa iyang ka live-in human sila magkabuwag sa iyang bana niadtong 2001.

Si PO3 Job Sarvida sa Barili Police Station nga nahinabi sa Sun.Star Superbalita niingon nga ang upat ka mga anak sa suspek ubos na karon sa pagbantay sa Department of Social Welfare and Development (DSWD).

Si PO3 Sarvida, nagkanayon nga depensa lang sa inahan ang pasangil niini ngadto sa iyang mga anak nga badlungon hinungdan nga nadapatan.

Matod niya nga ang mga bata mismo maoy ningtug-an nga grabing makadagmal ang ilang inahan.

Siya niingon wa mamakak ang bata.

Gani ang nawong sa 8 anyos dunay mga bun-og nga agi sa pagbunal sa kahoy, samtang dagko kaayog mga samad sa iyang mga kamot.

Sa impormasyon nga ilang nakuha moabot sa tunga sa adlaw niining gibitay ang iyang anak ug di tinuod ang pangangkon niini nga kapin lang sa singko minotos.

"Dili baya na mamakak ang mga bata. Dugay na gyud na niyang gidagmalan mao nga nanglayas sa ilang panimalay," sumala pa ni PO3 Sarvidad.

Nagpabilin nga gitangong ang inahan human mapasaka-i og kaso sanglit wa usab kiniy ika-piyansa hinungdan nga luoy kaayo ang sitwasyon sa pamilya.

Gawas pa buntis ang akusado.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph