USA ka patay'ng lawas ang nakaplagan niadtong Huwebes mga alas 6:30 sa gabii sa dalan sa Burgos-JR Borja St., Barangay 07 ning siyudad sa Cagayan de Oro.

Giila ang biktima nga mao si Macario Saluta, 63, minyo, walay saktong puloy-anan apan kanunay makita sa kadalanan.

Si PO3 Phillip Jhon Carriaga sa Police Station 1 (PS1) sa Divisoria nga nahinabi sa Sun.Star SuperBalita niingon nga usa ka residente sa dapit ang nakamatikod niini nga naghigda daplin sa dalan ug wala na naglihok hinungdan nga nangayo na lamang og tabang sa kapolisan.

Dali nga miresponde ang kapolisan ug nakitang nagbuy-od na ang biktima nga walay kinabuhi apan walay nakita nga bisan unsa nga matang sa samad.

Gikumpirmang walay foul play sa kamatayon ni Saluta ug gituohang giatake lamang kini sa iyang sakit gani pipila ka nakasaksi niingon nga posbleng wala na niini naagwanta ang kagutom tungod kay wala man kini saktong puloy-anan ug wala na usab pamilya niini.

Gani kanunay nga mamatikdan si Saluta nga maglakaw-lakaw sa kadalanan ug matulog sa bisan asang dapit sa Divisoria ning siyudad.

Sa pagsulat ning balita, gidala na ang patay'ng lawas sa Bollozos funeral parlor. (SVB)