HUMAN sa pagpanulong ug pagluwas sa mga pinriso sa Police Station 3 (PS3) sa Agora, gimando ang pag-relieve sa police station commander.
Si Police Superintendent Benidecto Lopez, city director sa Cagayan de Oro City Police Office (Cocpo), nibutyag sa Sun.Star SuperBalita nga unang lakang nga ilang himuon mao ang pag-relieve ni Police Inspector Wilyn Rojo, ang station commander sa PS3.
"The first thing nga himoun nato is relieved the station commander," matud ni Lopez.
Gidugang usab niini nga ipahigayon ang pag-imbestigar kang PO2 Rodrigo Reyes kinsa nag-inusara lamang sa presinto dihang gisulong sa duha ka mga lalake nga armado og kalibre .45 ang police station ug niluwas sa lima ka mga piniriso niadtong Huwebes sa gabii.
Gibutyag usab ni Lopez nga lakip susihon ang nitumaw nga taho nga wala tioni og armas si Reyes.
Samtang gikatakdang mag-atubang og kasong administratibo ang mga duty nga polis niadtong higayon kinsa giingong nagpatrolya atol sa hitabo hinungdan nga si Reyes lamang ang nahibilin sa presinto.
Gipasabot ni Lopez nga dunay proseso ang paghimo niini ug hatagan og higayon nga mapasabot ngadto kanila ang maong mga polis sa tinuod nga nahitabo ingon man gibutyag ni Lopez nga dili mahitabo ang susamang insidente ning dakbayan sa Cagayan de Oro.
"Sa kakulangan at katigasan nang ulo ng iibang polis natin sa Cagayan de Oro kaya nangyari ang ganito. Right now, I will make a policy regarding the right costudy of prison," dugang niini.
Samtang ang mga polis nga duty niadtong higayona nibutyag nga andam nilang dawaton ang resulta sa imbestigasyon ngadto kanila.
Gihimakak usab sa mga polis ang alegasyon nga wala sila magpatrolya kondili dunay gilakaw niadtong higayona.