Editoryal: Bag-ong paglaum

NABUHI karon ang dugo sa mga molupyo sa Mindanao ilabi na kadtong didto namuyo sa mga lugar nga apektado sa kagubot nga matag karon ug unya muolbo.

Si Presidenti Noynoy Aquino nagtudlo niadtong milabay nga adlaw ni UP law professor dean Marvic Leonen isip mangulo sa government panel nga makigsulti sa panel sa Moro Islamic Liberation Front (MILF) bahin sa kalinaw sa Mindanao.

Si Presidenti Aquino nagmando ni Leonin ug ni Presidential adviser on peace process Teresita Deles nga ipadayon na ang naundang nga peace talks.

Ang pagkaplastar sa bag-ong peace panel sa kagamhanan usa ka maayong panghitabo ug siguradong gikalipay karon sa katawhan nga dugay na nangandoy nga motunhay ang kalinaw sa tibuok Mindanao.

Sukad napusa ang komplikto tali sa MILF, ang pag-uswag sa daghang mga lugar sa Mindanao nabughat. Daghang mga banay misamot kagidlay ang panginabuhi tungod sa pagpunay og bakwit mao nga wa na naatiman ang ilang panginabuhi.

Sukad niadtong 1971, ang datus nagkanayon nga mikabat na sa 150 mil ka mga tawo ang gikatahong nangamatay tungod sa gubot.

Mga sundalo, mga sakop sa MILF ug mga sibilyan nagbuhis sa ilang kinabuhi sa katag-katag nga giyera.

Napupos ang administrasyong Arroyo ug ang kagamhanan migasto og dakong salapi sa gubat ug sa mga peace talks apan wa nakab-ot ang kalinaw.

Unta ning panahona, magmalampuson na ang Aquino Administration sa pagresolba sa gitay-an na nga komplikto.

Sa higayon nga makab-ot ang kalinaw, sigurado nga molambo ang tibuok isla sa Mindanao.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph