USA ka mag-uuma ang naghikog patay alas 9:00 sa gabii niadtong Huwebes sa probinsiya sa South Cotabato.
Nailhan sa kapulisan ang biktima nga mao si Ernie Kidlat, 38, ulitawo ug molupyo sa Barangay Poblacion, Polomolok sa maong probinsiya.
Gibutyag ni Armando Lanjare nga ilang nakit-an ang patay nga lawas sa iyang ig agaw nga nagbitay sa punoan sa santol likod sa iyang pinuy-anan, gamit ang pisi sa kabaw nga maoy gihikot sa iyang liog.
Gidugang ni Lanjare nga una naghikog si Kidlat, nag-uban pa sila sa pag-inom sa tindahan sa ilang silingan ug nag-istorya kini nga grabe ang iyang kahiubos gumikan kay milakaw nga way pananghid ang iyang 17 anyos nga babayeng kapuyo.
Namatikdan sab sa pamilya sa biktima nga mora'g nausab ang linihokan sa ulitawo human mibiya ang iyang kapuyo.
Mas misamot pa gyud ang iyang kasubo human nahibaloan nga miuban sa laing binuhat ang dalaga, hinungdan nga wa na siya maka-antos ug naka-desisyon nga kutluon ang iyang kinabuhi.
Ang kapulisan padayong nag-imbestiga kon wala bay foul play sa kamatayon sa biktima. (Edgardo Fuerzas)