USA ka mag-uuma napalgang patay human nahulog sa iyang giagian nga taytayan didto sa Purok 18, Barangay Mesaoy, lungsod sa New Corella, Davao del Norte niadtong Miyerkules sa buntag.
Nailhan ang biktima nga mao si Mario Escobio, 63, ug molupyo sa Purok 1, Barangay Mesaoy.
Sa nakuha nga report gikan sa Davao del Norte Police Provincial Office kagahapon, nasayran nga pasado alas 7:30 sa buntag, nakit-an sa usa ka alyas Jaypee ang biktima nga wa nay kinabuhi nga nagbuy-od sa usa ka kanal sulod sa kasagingan nga gipanag-iyahan ni Efren Barte.
Sa gihimong imbistigasyon sa kapulisan, nasayran nga mitabok sa nahisgutang kanal ang biktima agi sa mga slab nga lubi nga gihimong tulay apan aksidenting nadakin-as siya ug nahulog sa tulay.
Naparok ang ulo sa biktima hinungdan nga nahiagum siya og grabing bun-og resulta sa iyang kamatayon.
Nasuta sab nga ang biktima bag-o lang naayo human gikatahong na-stroke tungod sa iyang sakit nga hypertension.
Way nakitang "foul play" ang kapulisan sa kamatayon sa biktima ug gituohang aksidente gayod ang hinungdan sa iyang kamatayon.
Mga sakop sa New Corella MPS mihimo gihapon og dugang pakisusi sa hitabo. (Marvin Pineda)